ଗଞ୍ଜାମ : ସାମୁଦ୍ରିକ ମତ୍ସ୍ୟଜୀବୀ ନିମନ୍ତେ ମତ୍ସ୍ୟ ବିଭାଗ ପକ୍ଷରୁ ଏକ ସଚେତନତା ଶିବିର ଗଞ୍ଜାମ ବ୍ଲକ ଅନ୍ତର୍ଗତ ପୋଡମପେଟା ଗ୍ରାମର (କଣ୍ଟିଆଗଡ ମତ୍ସ୍ୟ ଅବତରଣ ଅଧିନସ୍ଥ) ସମସ୍ତ ସାମୁଦ୍ରିକ ମତ୍ସ୍ୟଜିବୀଙ୍କୁ ନେଇ ଏକ ସଚେତନତା ଶିବିର ଅନୁଷ୍ଠିତ ହୋଇଯାଇଛି । ସଚେତନତା ଶିବିରରେ ଅତିରିକ୍ତ ମତ୍ସ୍ୟ ଅଧିକାରୀ ସୁବ୍ରତ କୁମାର ପଟ୍ଟନାୟକ ଅଧ୍ୟକ୍ଷତା କରି ସରକାରଙ୍କ ପକ୍ଷରୁ ପ୍ରଦାନ କରାଯାଉଥିବା ବିଭିନ୍ନ ସୁବିଧା ସୁଯୋଗ ସମ୍ପର୍କରେ ଆଲୋକପାତ କରିଥିଲେ । ମତ୍ସ୍ୟ ଅଧିକାରୀ ବିଶ୍ବଭୂଷଣ ଜେନା, ଓ଼ମ୍ଫରା-୧୯୮୨ର ନିୟମ ଓ ଏହାର ପରିଚାଳନା ଏବଂ ତତ୍ ସହିତ ମାଛଧରା ନିଷେଧ ସମୟରେ ଥିବା ନିୟମାବଳୀ ଉପରେ ଅବଗତ କରାଇଥିଲେ ।
କଚ୍ଛପ ସୁରକ୍ଷା ଓ ରିଙ୍ଗ୍ ଜାଲର ବ୍ୟବହାର ମତ୍ସ୍ୟ ସମ୍ପଦ ଉପରେ କି ପ୍ରକାର ପ୍ରଭାବ ପକାଉଛି ଏବଂ ଏହାର ବ୍ୟବହାର କେଉଁଭଳି ମତ୍ସ୍ୟଜୀବୀଙ୍କୁ ଦୀର୍ଘସ୍ଥାୟୀ ରୋଜଗାରକ୍ଷମ କରାଇପାରୁଛି କି ନାହିଁ ଏହି ସଚେତନତା ଶିବିରର ମୁଖ୍ୟ ଆଲୋଚ୍ୟ ବିଷୟ ଥିଲା । ଏଥି ସହିତ ଜିଏଆଈଏସ୍, ନୂତନ ଡଙ୍ଗା, ଜାଲ ଓ ଇଞ୍ଜିନ୍, ସଞ୍ଚୟ ଓ ଉପଶମ, ମତ୍ସ୍ୟ ସମବାୟ ସମିତି ଗଠନ ଓ ପରିଚାଳନା ପ୍ରଭୁତି ଯୋଜନା ସମ୍ବଧିତ ତଥ୍ୟ, ମତ୍ସ୍ୟ ଅଧିକାରୀ ପୂଜାରାଣୀ ସାହୁ ବିଭଗ ତରଫରୁ ଉପସ୍ଥାପନା କରାଇଥିଲେ । ଉକ୍ତ ବୈଠକରେ ମତ୍ସ୍ୟଜୀବିମାନେ ନିଜ ନିଜର ମତ ଉପସ୍ଥାପନା କରିଥିଲେ ଓ ପୋଡମପେଟା ମତ୍ସ୍ୟ ସମବାୟ ସମିତିର ସମ୍ପାଦକ ଶ୍ରୀ ସିଏଚ ବାବାଜୀ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ । ସଚେତନତା ଶିବିରରେ ମତ୍ସ୍ୟ ବିଭାଗର ଅନ୍ୟାନ୍ୟ କାର୍ଯ୍ୟକର୍ତ୍ତାଙ୍କ ସହ , ସାଗରମିତ୍ର ଓ ଗ୍ରାମର ଲୋକ ଉପସ୍ଥିତ ଥିଲେ ।
Comments are closed.