ନୀଳଗିରି : ବନବିଭାଗର ଅଜବ ନୀତିକୁ ନେଇ ସମ୍ପ୍ରତି ଚର୍ଚ୍ଚା ଜୋର ଧରିଛି । ଜଙ୍ଗଲରେ ହାତୀ ମଲେ କାର୍ଯ୍ୟାନୁଷ୍ଠାନ ବଦଳରେ ଏଠାରେ ପୁରସ୍କାର ମିଳିବା ଘଟଣା ହଟଚମଟ ସୃଷ୍ଟି କରିଛି । ଏହି ଖବର ଶୁଣିବା ପରେ ଜନ୍ତୁପ୍ରେମୀ, ପରିବେଶବିତଙ୍କ ମଧ୍ୟରେ ଅସନ୍ତୋଷ ଭରି ଦେଇଛି । ଦୁଇଦିନ ପୂର୍ବରୁ ବନବିଭାଗ ତରଫରୁ ଭୁବନେଶ୍ୱର ଜୟଦେବ ଭବନରେ ଆୟୋଜିତ କାର୍ଯ୍ୟକ୍ରମରେ ଜଙ୍ଗଲ ଓ ପରିବେଶ ମନ୍ତ୍ରୀ ପ୍ରଦୀପ ଅମାତ, ପିସିସିଏଫ (ୱାଇଲ୍ଡ ଲାଇଫ) ଦେବୀଦତ୍ତ ବିଶ୍ୱାଳଙ୍କ ସମେତ ବିଭାଗୀୟ ଅଧିକାରୀମାନେ ଉପସ୍ଥିତ ରହିଥିଲେ। ଏଥିରେ ପଞ୍ଚଲିଙ୍ଗେଶ୍ୱର ଫରେଷ୍ଟରଙ୍କୁ ପୁରସ୍କୃତ କରାଯାଇଛି।
ଗତ ୨୦୨୨ମସିହା ମାର୍ଚ୍ଚ ୨୦ତାରିଖରେ ପଞ୍ଚଲିଙ୍ଗେଶ୍ୱର ସେକ୍ସନ ଅଧୀନ ବାମ୍ପିଦେଥଳି ଏବଂ ଫଟାଚୁଳିଆରେ ୨ଟି ହାତୀର ମୃତ୍ୟୁ ଘଟିଥିଲା । ଡିସେମ୍ବର ୧୦ତାରିଖରେ କଦମ୍ବଶୁଳ ଅଞ୍ଚଳରେ ଗୋଟିଏ, ଫେବୃୟାରୀ ୨୭ତାରିଖରେ ପଞ୍ଚଲିଙ୍ଗେଶ୍ୱରର ଆହୂତି ଜଙ୍ଗଲରେ ଏବଂ ପୁଣି ଚଳିତ ମାସରେ କଳମାଚତୁରୀରେ ଦନ୍ତା ହାତୀକୁ ହତ୍ୟା କରାଯାଇଛି। ଏହା ସତ୍ତ୍ୱେ ବାଲେଶ୍ୱର ଡିଭିଜନର କୁଲଡିହା ଅଭୟାରଣ୍ୟ ଅଧୀନ ପଞ୍ଚଲିଙ୍ଗେଶ୍ୱର ଫରେଷ୍ଟର ଭାଗ୍ୟଶ୍ରୀ ଦ୍ୱିବେଦୀଙ୍କୁ ରାଜ୍ୟ ସରକାର ପୁରସ୍କୃତ କରିବା ଘଟଣା ଉଦବେଗ ସୃଷ୍ଟି କରିଛି । ନୀଳଗିରିର କୁଲଡିହା ଅଭୟାରଣ୍ୟରେ କ୍ରମାଗତଭାବେ ହାତୀ ମୃତ୍ୟୁ ଏବଂ ଜଙ୍ଗଲ ଅସୁରକ୍ଷିତ ଅବସ୍ଥାରେ ପଡ଼ି ରହିଥିବା ସ୍ଥଳେ ରାଜ୍ୟ ସରକାର ସମ୍ପୃକ୍ତ ଫରେଷ୍ଟରଙ୍କୁ ପୁରସ୍କୃତ କରିବା ଘଟଣା ଅତ୍ୟନ୍ତ ନିନ୍ଦନୀୟ ବୋଲି ଚର୍ଚ୍ଚା ହୋଇଛି ।
