ଆଠଗଡ : ଘର ଭିତରେ ତିନୋଟି ନାଗ ସାପ ଦେଖି ଭୟରେ ତଟସ୍ଥ ପରିବାର। ସାପ ଭୟରେ ୪ ଦିନ ୪ ରାତି ଘର ବାହାରେ ରହିଥିଲେ ଏବଂ ସାପ ତିନୋଟିଯାକ ଉଦ୍ଧାର ହେବା ପରେ ଆଶ୍ବସ୍ତ ହୋଇ ନିଜ ଘରକୁ ଫେରିଥିଲା ପରିବାର। ଏଇଭଳି ଏକ ଅଭାବନୀୟ ଘଟଣା ଘଟିଛି ଚୌଦ୍ଵାର ଥାନା ଅନ୍ତର୍ଗତ ଡାଳିଯୋଡା ଅଞ୍ଚଳର ଆମ୍ବିଳିଝରି ଗ୍ରାମରେ। ସେହି ଗ୍ରାମର ତ୍ରିନାଥ ସାହୁଙ୍କ ଘରେ ଗତ ଶୁକ୍ରବାର ଅପରାହ୍ନରେ ତିନିଟି ନାଗ ସାପ ବୁଲୁଥିବା ପରିବାର ଲୋକ ଦେଖିଥିଲେ। ଭୟରେ ପରିବାର ସଦସ୍ୟ ପିଲାଛୁଆ ଧରି ବାହାରି ଆସି ପଡୋଶୀଙ୍କ ଘରେ ଆଶ୍ରୟ ନେଇଥିଲେ । ଗ୍ରାମର କେହି ସାପ ଧରିବାକୁ ସାହାସ କରି ପାରିନଥିଲେ । ପରଦିନ ଆଖପାଖ ଅଞ୍ଚଳର ସାପ ଧରାଳିଙ୍କ ସହାୟତା ନିଆଯାଇଥିଲେ ମଧ୍ଯ କେହି ସାପ ଉଦ୍ଧାର କରିବାରେ ସକ୍ଷମ ହୋଇନଥିଲେ।
ଶେଷରେ କୌଣସି ସୂତ୍ରରୁ ଖବର ପାଇ ଉକ୍ତ ପରିବାର ଲୋକ ଆଠଗଡର ଅଭିଜ୍ଞ ସାପ ଧରାଳି ତଥା ସ୍ନେକ ହେଲ୍ପଲାଇନ ସଦସ୍ଯ ସୁଶାନ୍ତ କୁମାର ପାତ୍ରଙ୍କ ସହାୟତା ଲୋଡିଥିଲେ। ମଙ୍ଗଳବାର ସୁଶାନ୍ତ ଉକ୍ତ ଗ୍ରାମକୁ ଯାଇ ସଂପୃକ୍ତ ଘରେ ଭିନ୍ନ ଭିନ୍ନ ସ୍ଥାନରେ ଲୁଚି ରହିଥିବା ୨ଟି ୪ ଫୁଟ ଲମ୍ବ ଓ ଗୋଟିଏ ୩ ଫୁଟ ଲମ୍ବର ନାଗ ସାପକୁ ଅକ୍ଳାନ୍ତ ପରିଶ୍ରମ କରି ସୁରକ୍ଷିତ ଉଦ୍ଧାର କରିଥିଲେ। ପରେ ସାପ ତିନୋଟିକୁ ନିକଟସ୍ଥ ଡମଡମଣୀ ଜଙ୍ଗଲରେ ଛାଡି ଦେଇଥିଲେ ।
Comments are closed.