ଅଳ୍ପକେ ବର୍ତ୍ତିଲା କୁନିଝିଅ, ଛାତ ଉପରେ ଲୁଗା ଶୁଖାଇବାବେଳେ ଅଘଟଣ ଚାଲିଗଲା ପରିବାରର ତିନି ଜଣଙ୍କ ଜୀବନ
୧୧ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସି ପରିବାରର ୩ ମୃତ
ସିଂହପୁର (ନି.ପ୍ର): ବିଦ୍ୟୁତ୍ ଆଘାତରେ ପରିବାରରେ ତିନିଜଣ ପ୍ରାଣ ହରାଇଥିବା ଭଳି ଏକ ଦୁଃଖଦ ଖବର ସମସ୍ତଙ୍କୁ ହତବାକ୍ କରିଛି। ଏହି ଦୁର୍ଘଟଣାରେ ସାରା ପରିବାର ପ୍ରାଣ ହରାଇଥିବାବେଳେ ଗୋଟିଏ ଝିଅ ବଞ୍ଚି ଯାଇଥିବା ଜଣାଯାଇଛି। ପ୍ରକାଶ ଯେ ବିଞ୍ଝାରପୁର ବ୍ଲକ ତଥା ବରପଦା ଗ୍ରାମ ପଞ୍ଚାୟତ ଅନ୍ତର୍ଗତ ବିଦାପଡ଼ା ଗ୍ରାମର ବାସୁଦେବ ମଲିକ (୩୫) ହାଇଦରାବାଦ୍ଠାରେ ଏକ କମ୍ପାନୀରେ କାମ କରୁଥିଲେ।
ସେ ଏକ ତିନିତାଲା କୋଠାଘରର ଏକ କୋଠରୀରେ ଭଡ଼ାରେ ସ୍ତ୍ରୀ ରୀନା ମଲିକ ଓ ଦୁଇଝିଅ ଶୁଭଶ୍ରୀ (୮), ବିଶ୍ୱଶ୍ରୀ (୬)ଙ୍କୁ ନେଇ ରହୁଥିଲେ। ସେ ରହୁଥିବା ଘରଟି ଉପରେ ୧୧ କେଭି ବିଦ୍ୟୁତ୍ ତାର ଯାଇଥିଲା। ଗାଧୋଇ ସାରି ଲୁଗା ଶୁଖାଇବା ପାଇଁ ବାସୁଦେବ ଛାତ ଉପରକୁ ଯାଇଥିବାବେଳେ ଏହି ୧୧କେଭି କେବୁଲ ସଂସ୍ପର୍ଶରେ ଆସିଥିଲେ। ରୀନା ମଲିକ ତାଙ୍କର ସାନ ଝିଅକୁ କାଖେଇଥିବା ଅବସ୍ଥାରେ ଆସି ସ୍ୱାମୀଙ୍କୁ ବଞ୍ଚାଇବା ପାଇଁ ଧରି ପକାଇବାକ୍ଷଣି ସେ ମଧ୍ୟ ବିଦ୍ୟୁତ୍ ସଂସ୍ପର୍ଶରେ ଆସି ପୋଡ଼ି ଯାଇଥିଲେ। ଘଟଣା ସ୍ଥଳରେ ବାସୁଦେବ ଓ ସାନଝିଅ ବିଶ୍ୱଶ୍ରୀ ପ୍ରାଣ ହରାଇଥିଲେ।
ଗୁରୁତର ଅବସ୍ଥାରେ ଡାକ୍ତରଖାନା ନିଆଯାଉଥିବାବେଳେ ବାଟରେ ରୀନାର ମଧ୍ୟ ମୃତ୍ୟୁ ଘଟିଥିଲା। ଏହି ଦୁର୍ଘଟଣାରୁ ବଡ଼ଝିଅ ଶୁଭଶ୍ରୀ ବଞ୍ଚି ଯାଇଛି। ଘଟଣାଟି ପ୍ରଚାରିତ ହେବା ପରେ ବିଞ୍ଝାରପୁର ଅଞ୍ଚଳରେ ଶୋକର ଛାୟା ଖେଳି ଯାଇଛି।
Comments are closed.