ନୂଆଦିଲ୍ଲୀ : ଭାରତଛାଡ଼ ଆନ୍ଦୋଳନକୁ ମନେପକାଇବା ଉଦେଶ୍ୟରେ ରାଷ୍ଟ୍ରପତି ଭବନରେ ଆୟୋଜିତ ଆଟ-ହୋମ କାର୍ଯ୍ୟକ୍ରମରେ ଓଡ଼ିଶାର ତିନି ଜଣ ସ୍ୱାଧୀନତା ସଂଗ୍ରାମୀ ଯୋଗଦେଇଛନ୍ତି। ଭଦ୍ରକର ରାମହରି ଗୋସ୍ୱାମୀ, ନୟାଗଡ଼ର ଇଶ୍ୱର ବିଷୋୟୀ ଓ ସମ୍ବଲପୁରର ଦେବାନନ୍ଦ ଗୁପ୍ତା ରାଷ୍ଟ୍ରପତି ରାମନାଥ କୋବିନ୍ଦଙ୍କ ଆମନ୍ତ୍ରଣ କ୍ରମେ ଗୁରୁବାର ଆଟ-ହୋମ କାର୍ଯ୍ୟକ୍ରମରେ ସାମିଲ ହୋଇଥିଲେ। କାର୍ଯ୍ୟକ୍ରମରେ ସ୍ୱାଧୀନତା ସଂଗ୍ରାମୀଙ୍କ ସହ ରାଷ୍ଟ୍ରପତି ରାମନାଥ କୋବିନ୍ଦ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଲୋଚନା କରିଥିଲେ। ଭଦ୍ରକ ଜିଲା ଧୁଷୁରୀ ଅଞ୍ଚଳର ସୂର୍ଯ୍ୟପୁର ଗ୍ରାମର ୯୦ ବୟସ୍କ ସ୍ୱାଧୀନତା ସଂଗ୍ରାମୀ ରାମହରି ଗୋସ୍ୱାମୀ ୧୯୪୨ରେ ଭାରତଛାଡ଼ ଆନ୍ଦୋଳନରେ ସାମିଲ ହୋଇଥିଲେ। ଭଣ୍ଡାରୀପୋଖରୀ ଥାନା ପୋଡାଜଳା ଘଟଣାରେ ସଂପୃକ୍ତି ନେଇ ଗିରଫ ଶ୍ରୀ ଗୋସ୍ୱାମୀ ବାଲେଶ୍ୱର ଜେଲରେ ସାତ ମାସ ରହିଥିଲେ। ନୟାଗଡ଼ ଜିଲା ରଣପୁର ମାଝୀଖଣ୍ଡ ଗ୍ରାମର ୮୯ ବର୍ଷୀୟ ଇଶ୍ୱର ବିଷୋୟୀ ଇଣ୍ଡିଆନ ନ୍ୟାସନାଲ ଆର୍ମିରେ ସାମିଲ ହୋଇ ରେଙ୍ଗୁନ କେନ୍ଦ୍ରୀୟ ଜେଲରେ ୨୬ ମଇ ୧୯୪୫ରୁ ୨୭ ଅପ୍ରେଲ ୧୯୪୬ ବନ୍ଦୀ ଜୀବନ ବିତାଇଥିଲେ। ଅବିଭକ୍ତ ସମ୍ବଲପୁର ଜିଲା ରାମିଲା ଥାନା ଅନ୍ତର୍ଗତ ଫଟାପାଲ୍ଲୀ ଗ୍ରାମର ଦେବାନନ୍ଦ ଗୁପ୍ତା ଏକ ମନ୍ଦିରରେ ଆୟୋଜିତ ଜନସଭାରେ ଉପସ୍ଥିତ ଜନତାଙ୍କୁ ଭାରତଛାଡ଼ ଆନ୍ଦୋଳନର ମହତ୍ୱ ବୁଝାଉଥିବା ବେଳେ ବ୍ରିଟିଶ ପୋଲିସ ଦ୍ୱାରା ୨୫ ଅଗଷ୍ଟ ୧୯୪୨ରେ ଗିରଫ ହୋଇ ଜେଲ ଯାଇଥିଲେ। ପ୍ରାୟ ୧୧ମାସ ଜେଲ ଭୋଗିବା ପରେ ଶ୍ରୀ ଗୁପ୍ତା ମୁକୁଳି ଥିଲେ। ଦିଲ୍ଲୀରେ ରହଣି ଏବଂ ରାଷ୍ଟ୍ରପତି ଭବନକୁ ଯିବା ପାଇଁ ରାଜ୍ୟ ସରକାରଙ୍କ ପ୍ରମୁଖ ଆବାସିକ କମିଶନରଙ୍କ କାର୍ଯ୍ୟାଳୟ ପକ୍ଷରୁ ବ୍ୟବସ୍ଥା କରାଯାଇଥିଲା।
Popular Categories
Previous article
Next article