ଭୁବନେଶ୍ୱର: ବିଜେଡିରୁ ବହିଷ୍କୃତ ହୋଇଥିବା ବରିଷ୍ଠ ନେତା ଦାମୋଦର ରାଉତଙ୍କ ସିଟ୍ ସୋମବାର ବିଧାନସଭାରେ ପରିବର୍ତ୍ତନ ହୋଇଛି । ପୂର୍ବରୁ ଦାମୋଦର ରାଉତ ଡି-୩(D-3) ସିଟ୍ ରେ ବସୁଥିବା ବେଳେ ଆଜିଠାରୁ ଏଫ-୧୦(F-10) ସିଟ୍ ଦିଆଯାଇଛି । ଆଜି ଗୃହରେ ବାଚସ୍ପତି ପ୍ରଦୀପ ଅମାତ ଘୋଷଣା କରିଛନ୍ତି ।
ପଞ୍ଚଦଶ ବିଧାନସଭାରେ ଚତୁର୍ଥ ଥର ପାଇଁ ବିଧାୟକ ଦାମୋଦର ରାଉତଙ୍କ ଆସନ ବଦଳିଛି । ୨୦୧୪ ନିର୍ବାଚନରେ ପାରାଦ୍ୱୀପ ବିଧାନସଭା ଆସନରୁ ନିର୍ବାଚିତ ହୋଇ ମନ୍ତ୍ରୀ ପଦ ପାଇବା ପରେ ସେ ମୁଖ୍ୟମନ୍ତ୍ରୀ ବସୁଥିବା ଧାଡିର ତୃତୀୟ ଆସନରେ ବସୁଥିଲେ। ମୁଖ୍ୟମନ୍ତ୍ରୀଙ୍କ ନିକଟରେ ତତ୍କାଳୀନ ଅର୍ଥମନ୍ତ୍ରୀ ପ୍ରଦୀପକୁମାର ଅମାତଙ୍କ ଆସନ ଥିଲା। ଶ୍ରୀ ଅମାତ ବାଚସ୍ପତି ହେବା ପରେ ଦାମଙ୍କ ଆସନ ବଦଳିଥିଲା। ତାଙ୍କୁ ମୁଖ୍ୟମନ୍ତ୍ରୀଙ୍କ ପାଖ ଆସନ ମିଳିଥିଲା। ଗତ ଡିସେମ୍ବର ମାସରେ ମନ୍ତ୍ରିପଦରୁ ବିଦା ହେବା ପରେ ତାଙ୍କୁ ଅନ୍ୟ ଆସନକୁ ପଠାଇ ଦିଆଯାଇଥିଲା। ଏବେ ବିଜେଡିରୁ ବହିଷ୍କୃତ ହେବା ପରେ ସେ ଅସଂଲଗ୍ନ (ଅନ୍ ଆଟାଚ୍ଡ) ବିଧାୟକ ରହିବେ।
ସୂଚନାଯୋଗ୍ୟ, ଗତ ୧୫ ତାରିଖରେ ଦାମୋଦର ରାଉତଙ୍କ ବହିଷ୍କୃତ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାଚସ୍ପତିଙ୍କୁ ଅବଗତ କରାଇଥିଲେ । ଏହି ଆଧାରରେ ସେ ଆଉ ବିଜେଡି ବିଧାୟକ ଭାବେ ଗଣା ହେବେ ନାହିଁ। ଦାମଙ୍କ ବହିଷ୍କାର ପରେ ଗୃହରେ ଦଳୀୟ ବିଧାୟକଙ୍କ ସଂଖ୍ୟା ୧୧୭କୁ ହ୍ରାସ ପାଇଛି।
