ଭୁବନେଶ୍ୱର: ତିନି ଦିନ ଧରି ଅଚଳ ଥିବା ବିଧାନସଭା ଆଜି ସ୍ବାଭାବିକ ରହିଛି । ଶାନ୍ତି ଶୃଙ୍ଖଳାରେ ଗୃହରେ ପ୍ରଶ୍ନୋତ୍ତର କାର୍ଯ୍ୟକାଳ ଚାଲିଛି । ରାଜ୍ୟ ସରକାରଙ୍କ ‘ଖୁସି’ ଯୋଜନା ମାଧ୍ୟମରେ ଯୋଗାଇ ଦିଆଯାଉଥିବା ସାନିଟାରୀ ନାପ୍କିନ୍ ପ୍ରସଙ୍ଗରୁ ପ୍ରଶ୍ନୋତ୍ତର କାଳ ଆରମ୍ଭ ହୋଇଥିଲା । ଆଜି ବିରୋଧୀଙ୍କ ପ୍ରଶ୍ନର ଉତ୍ତର ରଖିଥିଲେ ସ୍ୱାସ୍ଥ୍ୟ ମନ୍ତ୍ରୀ ପ୍ରତାପ ଜେନା ।
ସୂଚନାଯୋଗ୍ୟ, ଲୋକାୟୁକ୍ତ ନିଯୁକ୍ତିକୁ ନେଇ ତିନି ଦିନ ଧରି ଗୃହରେ ଅଚଳାବସ୍ଥା ଲାଗି ରହିଥିଲା । ବିରୋଧୀ ଦଳର ନେତାମାନେ ଗୃହ ଆରମ୍ଭରୁ ହୋ-ହାଲ୍ଲା କରିବା ସହ ଧାରଣାରେ ବସିଥିଲେ । ଏହି କାରଣରୁ ନିନି ଧରି ଗୃହକୁ ମୁଲତବି ଘୋଷଣା କରି ଆସୁଥିଲେ ବାଚସ୍ପତି । ଗତକାଲି ସନ୍ଧ୍ୟାରେ ଏକ ସର୍ବଦଳୀୟ ବୈଠକ ଅନୁଷ୍ଠିତ ହୋଇଥିଲା। ବୈଠକରେ ନିଷ୍ପତ୍ତି ଅନୁଯାୟୀ ସରକାରଙ୍କ ତରଫରୁ ଲୋକାୟୁକ୍ତ ନିଯୁକ୍ତିରେ ବିଳମ୍ବ ନେଇ ଗୃହରେ ବିବୃତ୍ତି ରଖାଯିବ । ଏହି ନିଷ୍ପତ୍ତିରେ ସମସ୍ତ ବିରୋଧୀ ଦଳ ରାଜି ହୋଇ ଆଜିର କାର୍ୟ୍ୟରେ ସାମିଲ ହୋଇଛନ୍ତି ।