ଧରମଶାଳା : ସାମାନ୍ୟ ମତଭେଦ ଓ ବାକ୍ବିତଣ୍ଡାର ଭୟଙ୍କର ପରିଣତି କ୍ରମେ ହିମାଚଳ ପ୍ରଦେଶର ଧର୍ମଶାଳାସ୍ଥିତ ସେନା ଶିବିରରେ ୩ ଜଣ ଯବାନଙ୍କ ମୃତ୍ୟୁ ହୋଇଛି। ମାମୁଲି ଯୁକ୍ତିତର୍କକୁ କେନ୍ଦ୍ର କରି ଜଣେ ଯବାନ ନିଜର ୨ ଜଣ ସହକର୍ମୀଙ୍କୁ ଗୁଳିମାରି ହତ୍ୟା କରିବା ପରେ ନିଜେ ଆତ୍ମହତ୍ୟା କରିଛନ୍ତି। ରବିବାର ରାତି ପ୍ରାୟ ୨ଟା ୨୫ ମିନିଟ୍ରେ ଘଟିଛି ଏହି ଅଭାବନୀୟ ଘଟଣା। ୧୮ ଶିଖ୍ ରେଜିମେଣ୍ଟର ଗାର୍ଡ ଦାୟିତ୍ୱରେ ଥିବା ଯଶବୀର ସିଂହଙ୍କର ହାବଲଦାର ହରଦୀପ ସିଂହ ଏବଂ ନାଏକ ହରପାଲ ସିଂହଙ୍କ ସହିତ କୌଣସି କାରଣରୁ ବଚସା ହୋଇଥିଲା। ହରଦୀପ ଓ ହରପାଲ ଏହି ଘଟଣା ପରେ ସେଠାରୁ ଚାଲିଯାଇଥିଲେ। ମାତ୍ର ଯଶବୀର କ୍ରୋଧ ଜର୍ଜରିତ ହୋଇପଡିଥିଲେ। ହରଦୀପ ଓ ହରପାଲ ଫେରିବା କ୍ଷଣି ସେ ସେମାନଙ୍କ ଉପରକୁ ଗୁଳିମାଡ଼ କରିଥିଲେ। ପରେ ନିଜ ମୁଣ୍ଡକୁ ଗୁଳି କରି ଆତ୍ମହତ୍ୟା କରିଥିଲେ ବୋଲି ରେଜିମେଣ୍ଟର କମାଣ୍ଡିଂ ଅଫିସର କର୍ଣ୍ଣେଲ ନବଦୀପ ବ୍ରାର ପ୍ରକାଶ କରିଛନ୍ତି। ବଚସାର କାରଣ ଏଯାବତ୍ ଜଣାପଡିନାହିଁ। ଯଶବୀର ଦେଢ ବର୍ଷ ପୂର୍ବେ ସେନାରେ ଯୋଗ ଦେଇଥିବା ବେଳେ ହରଦୀପ ଓ ହରପାଲ ଯଥାକ୍ରମେ ୨୩ ଓ ୧୮ ବର୍ଷ ହେବ ଭାରତୀୟ ସେନାରେ କାର୍ଯ୍ୟ କରିଆସୁଥିଲେ। ସାମରିକ ଗୁଇନ୍ଦା ଏବଂ କାଙ୍ଗ୍ରା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ମୃତଦେହଗୁଡିକ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଯାଇଛି।
Popular Categories
Previous article
Next article