ଦେଶ ବିରୋଧୀ ନାରା ଦେଇଥିବା ଯୁବତୀ ଆତଙ୍କବାଦୀଙ୍କ ସହ ସମ୍ପୃକ୍ତ: ମୁଖ୍ୟମନ୍ତ୍ରୀ

ବେଙ୍ଗାଲୁରୁ: ନାଗରିକତା ସଂଶୋଧନ ଆଇନ(ସିଏଏ) ବିରୋଧରେ ବେଙ୍ଗାଲୁରୁରେ ଆୟୋଜିତ ରାଲିରେ ଏଆଇଏମଆଇଏମ ମୁଖ୍ୟ ଅସଉଦ୍ଦିନ ଓୱେସୀଙ୍କ ସାମ୍ମାନରେ ପାକିସ୍ତାନ ଜିନ୍ଦାବାଦ ନାରା ଦେଇଥିବା ଅମୂଲ୍ୟା ଲିୟୋନଙ୍କର ଆତଙ୍କବାଦୀଙ୍କ ସହିତ ସମ୍ପର୍କ ରହିଛି ବୋଲି କର୍ଣ୍ଣାଟକ ମୁଖ୍ୟମନ୍ତ୍ରୀ ବି.ଏସ. ୟେଦ୍ଦୁରପ୍ପା କହିଛନ୍ତି। ତାକୁ ଜାମିନ ମିଳିବା ଉଚିତ ନୁହେଁ । ତା’ ବାପା ବି ତା’କୁ ସହାୟତା କରିବେ ନାହିଁ ବୋଲି କହିଛନ୍ତି। ଏଥିରୁ ପ୍ରମାଣିତ ହେଉଛି ଯେ, ଆତଙ୍କବାଦୀଙ୍କ ସହିତ ତା’ର ସମ୍ପର୍କ ରହିଛି। ତା’କୁ କଠୋର ଦଣ୍ଡ ଦେବା ଜରୁରୀ ବୋଲି ୟେଦ୍ଦୁରପ୍ପା କହିଛନ୍ତି।

ଅନ୍ୟପଟେ ଅମୂଲ୍ୟା ବିରୋଧରେ ଦେଶଦ୍ରୋହ ମାମଲା ରୁଜୁ କରାଯାଇ ଗିରଫ କରାଯାଇଛି। ଜାମିନ ନାମଞ୍ଜୁର ହେବା ପରେ ତା’କୁ ୧୪ ଦିନ ପର୍ଯ୍ୟନ୍ତ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଗୃହମନ୍ତ୍ରୀ ବାସୱାରାଜ ବୋମ୍ମଇ କହିଛନ୍ତି ଯେ, ଅମୂଲ୍ୟ ଏଭଳି ସ୍ଥାନରୁ ଆସିଛି, ଯେଉଁଠି ଦୀର୍ଘ ସମୟ ପର୍ଯ୍ୟନ୍ତ ଆତଙ୍କବାଦୀ ସକ୍ରିୟ ରହିଛନ୍ତି। ତା’ର ଫେସବୁକରେ ବି ଅନେକ ପୋଷ୍ଟ ଶେୟାର କରାଯାଇଛି। ଏହି ଦିଗ ପ୍ରତି ମଧ୍ୟ ତଦନ୍ତ କରାଯିବ।

ବେଙ୍ଗାଲୁରୁ ପୁଲିସ କମିଶନର ଭାସ୍କର ରାଓ କହିଛନ୍ତି, ଅମୂଲ୍ୟା ଏବଂ ଅନ୍ୟମାନଙ୍କ ବିରୋଧରେ ମାମଲା ରୁଜୁ ହୋଇଛି। ଆୟୋଜକଙ୍କ ଭୂମିକା କ’ଣ ରହିଛି ତାହା ଯାଞ୍ଚ କରାଯାଉଛି। ସାଂସଦ ଓୱେସୀଙ୍କ ଭୂମିକା ଦେଖିବାକୁ ମିଳିନାହିଁ, କାରଣ ସେ ବି ଜଣେ ଆମନ୍ତ୍ରିତ ଅତିଥି ଥିଲେ ବୋଲି ରାଓ କହିଛନ୍ତି।