ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଙ୍ଗଳବାର (୩୧ ଅକ୍ଟୋବର) ଅପରାହ୍ଣ ୫ଟାରେ କର୍ତ୍ତବ୍ୟ ପଥରେ ମେରି ମାଟି ମେରା ଦେଶ ଅଭିଯାନର ଅମୃତ କଳସ ଯାତ୍ରାର ଉଦଯାପନୀ ସମାରୋହରେ ଯୋଗ ଦେବେ। ଆଜାଦୀ କା ଅମୃତ ମହୋତ୍ସବର ଉଦଯାପନୀ ସମାରୋହ ଉପଲକ୍ଷେ ଏହି କାର୍ଯ୍ୟକ୍ରମ ଅନୁଷ୍ଠିତ ହେବ। ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଅମୃତ ବାଟିକା ଏବଂ ଅମୃତ ମହୋତ୍ସବ ସ୍ମାରକୀକୁ ଉଦ୍ଘାଟନ କରିବେ। ପ୍ରଧାନମନ୍ତ୍ରୀ ଏହି କାର୍ଯ୍ୟକ୍ରମରେ ଯୋଗ ଦେଇ ଦେଶର ହଜାର ହଜାର ଅମୃତ କଳସ ଯାତ୍ରୀଙ୍କୁ ସମ୍ବୋଧନ କରିବେ। ଏହି କାର୍ଯ୍ୟକ୍ରମରେ, ପ୍ରଧାନମନ୍ତ୍ରୀ ଦେଶର ଯୁବବର୍ଗଙ୍କ ପାଇଁ ‘ମେରା ୟୁବା ଭାରତ (ଏମୱାଇ ଭାରତ) ପ୍ଲାଟଫର୍ମର ଶୁଭାରମ୍ଭ କରିବେ। ମେରି ମାଟି ମେରା ଦେଶ ଅଭିଯାନ ଦେଶ ପାଇଁ ସର୍ବୋଚ୍ଚ ବଳିଦାନ ଦେଇଥିବା ବୀର ଏବଂ ବୀରଙ୍ଗନାମାନଙ୍କ ପ୍ରତି ଶ୍ରଦ୍ଧାଞ୍ଜଳି। ଜନଭାଗିଦାରୀ ଭାବନାରେ ଏହି ଅଭିଯାନରେ ପଞ୍ଚାୟତ, ଗ୍ରାମ, ବ୍ଲକ୍, ସହର, ରାଜ୍ୟ ଓ ଜାତୀୟସ୍ତରରେ ବିଭିନ୍ନ କାର୍ଯ୍ୟକ୍ରମ ଓ ସମାରୋହ ଆୟୋଜନ କରାଯାଇଥିଲା। ‘ମେରି ମାଟି ମେରା ଦେଶ’ ଅଭିଯାନରେ ଅମୃତ କଳସ ଯାତ୍ରା ମଧ୍ୟ ଅନ୍ତର୍ଭୁକ୍ତ, ଯେଉଁଥିରେ ଗ୍ରାମାଞ୍ଚଳର ୬ ଲକ୍ଷରୁ ଅଧିକ ଗ୍ରାମ ଏବଂ ସହରାଞ୍ଚଳର ୱାର୍ଡରୁ ମାଟି ଏବଂ ଚାଉଳ ସଂଗ୍ରହ କରାଯାଇ ବ୍ଲକ୍ ସ୍ତରକୁ ପଠାଯାଇଛି ଏବଂ ପରେ ରାଜ୍ୟ ରାଜଧାନୀକୁ ପଠାଯାଇଛି। ହଜାର ହଜାର ଅମୃତ କଳସ ଯାତ୍ରୀଙ୍କ ସହ ରାଜ୍ୟସ୍ତରରୁ ଏହି ମାଟିକୁ ଜାତୀୟ ରାଜଧାନୀକୁ ପଠାଯାଇଛି। ଅକ୍ଟୋବର ୩୦ରେ ଅମୃତ କଳସ ଯାତ୍ରାରେ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ପ୍ରତିନିଧିତ୍ୱ କରୁଥିବା ଦେଖିବାକୁ ମିଳିଛି। ସହରାଞ୍ଚଳ ସ୍ଥାନୀୟ ସଂସ୍ଥାମାନେ ନିଜ ନିଜ କଳସର ମାଟିକୁ ଏକ ବିଶାଳ ଅମୃତ କଳସରେ ‘ଏକ ଭାରତ ଶ୍ରେଷ୍ଠ ଭାରତ’ ଭାବନାରେ ଭର୍ତ୍ତି କରିଛନ୍ତି। କର୍ତ୍ତବ୍ୟ ପଥରେ ପ୍ରଧାନମନ୍ତ୍ରୀଙ୍କ ଦ୍ୱାରା ଉଦ୍ଘାଟନ କରାଯାଉଥିବା ଅମୃତ ବାଟିକା ଓ ଅମୃତ ମହୋତ୍ସବ ସ୍ମାରକୀ ଦେଶର କୋଣ ଅନୁକୋଣରୁ ସଂଗୃହୀତ ମାଟିରୁ ନିର୍ମାଣ କରାଯାଇଛି। ‘ଆଜାଦୀ କା ଅମୃତ ମହୋତ୍ସବ’ ର ଅନ୍ତିମ କାର୍ଯ୍ୟକ୍ରମ ଭାବେ ମେରି ମାଟି ମେରା ଦେଶ ଅଭିଯାନର ପରିକଳ୍ପନା କରାଯାଇଥିଲା। ଭାରତର ସ୍ୱାଧୀନତାର ୭୫ ବର୍ଷ ପୂର୍ତ୍ତି ପାଳନ ଅବସରରେ ୨୦୨୧ ମାର୍ଚ୍ଚ ୧୨ ତାରିଖରୁ ଆଜାଦି କା ଅମୃତ ମହୋତ୍ସବ ଆରମ୍ଭ ହୋଇଥିଲା। ଏହା ପରେ ସମଗ୍ର ଦେଶରେ ୨ ଲକ୍ଷରୁ ଅଧିକ କାର୍ଯ୍ୟକ୍ରମ ଆୟୋଜନ କରାଯାଇଛି ଯେଉଁଥିରେ ଉତ୍ସାହଜନକ ଜନଭାଗିଦାରୀତା ଦେଖିବାକୁ ମିଳିଛି।
Comments are closed.