ଭୁବନେଶ୍ୱର : ଦୀର୍ଘ ୨୯ବର୍ଷ ପରେ ଓଡ଼ିଶାରେ ୨୪ତମ ପୂର୍ବାଞ୍ଚଳ ପରିଷଦ ବୈଠକ(ଇଷ୍ଟର୍ଣ୍ଣ ଜୋନାଲ କାଉନସିଲ ମିଟିଂ) ଅନୁଷ୍ଠିତ ହେବାକୁ ଯାଉଛି। ଆସନ୍ତା ୨୮ରେ ଲୋକସେବା ଭବନର ନବ ଉଦଘାଟିତ କନଫରେନ୍ସ ହଲରେ ପୂର୍ବାଞ୍ଚଳ ପରିଷଦ ବୈଠକ ବସିବ। ଏଥିରେ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ କୁମାର ଶାହା ଯୋଗଦେବାର କାର୍ଯ୍ୟକ୍ରମ ରହିଛି।
ସୂଚନା ଅନୁଯାୟୀ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଶ୍ରୀ ଶାହାଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହେବ। ବୈଠକରେ ଓଡ଼ିଶା ସମେତ ପଶ୍ଚିମବଙ୍ଗ, ଝାଡଖଣ୍ଡ ଓ ବିହାର ପ୍ରଭୃତି ରାଜ୍ୟର ମୁଖ୍ୟମନ୍ତ୍ରୀ ଏବଂ ମୁଖ୍ୟସଚିବ ଯୋଗଦେବାର କାର୍ଯ୍ୟକ୍ରମ ରହିଛି। ଏହି ଅବସରରେ ପୂର୍ବାଞ୍ଚଳ ରାଜ୍ୟଗୁଡିକ ସହିତ କେନ୍ଦ୍ରର ବିଭିନ୍ନ ଆଭ୍ୟନ୍ତରୀଣ ବିଷୟବସ୍ତୁ ଉପରେ ଆଲୋଚନା ହେବ। ରାଜ୍ୟ ପ୍ରତି କେନ୍ଦ୍ର ସରକାରଙ୍କ ଥିବା କର୍ତ୍ତବ୍ୟରେ କେଉଁଠି ଅବହେଳା ହେଉଛି ଏବଂ ରାଜ୍ୟର ଆଭ୍ୟନ୍ତରୀଣ ସୁରକ୍ଷା ପାଇଁ କ’ଣ ସବୁ ଆବଶ୍ୟକତା ରହିଛି ସେନେଇ ବିସ୍ତୃତ ଆଲୋଚନା କରାଯିବ।
ଷ୍ଟେଟ ରେକୋଗନାଇଜେସନ ଆକ୍ଟ-୧୯୫୬ ଅନୁଯାୟୀ ପଶ୍ଚିମବଙ୍ଗରେ ପ୍ରଥମଥର ପାଇଁ ପୂର୍ବାଞ୍ଚଳ ପରିଷଦ ବୈଠକ ଅନୁଷ୍ଠିତ ହୋଇଥିଲା। ଏହାର ଦୁଇବର୍ଷ ପରେ ୧୯୫୯ରେ ଏବଂ ୧୯୭୯ରେ ଭୁବନେଶ୍ବରରେ ପୂର୍ବାଞ୍ଚଳ ବୈଠକ ଅନୁଷ୍ଠିତ ହୋଇଥିଲା। ଶେଷଥର ପାଇଁ ୧୯୯୧ ସେପ୍ଟେମ୍ବର ୨୧ରେ ଭୁବନେଶ୍ବରରେ ବୈଠକ ବସିଥିଲା। ଦୀର୍ଘ ୨୯ବର୍ଷ ପରେ ପୁଣିଥରେ ଲୋକସେବା ଭବନରେ ପୂର୍ବାଞ୍ଚଳ ବୈଠକ ଅନୁଷ୍ଠିତ ହେବାକୁ ରହିଛି।
