‘ପୁଷ୍ପା-୨’: ପୁଣି ଧମାଲ୍‌ ମଚାଇବାକୁ ପ୍ରସ୍ତୁତ ଅଲ୍ଲୁ ଅର୍ଜୁନ

ମୁମ୍ବାଇ: ଲୋକପ୍ରିୟ ଦକ୍ଷିଣ ଭାରତୀୟ ଅଭିନେତା ଅଲ୍ଲୁ ଅର୍ଜୁନ ଅଭିନୀତ ଚଳଚ୍ଚିତ୍ର ‘ପୁଷ୍ପା’ର ଅବିଶ୍ବସନୀୟ ସଫଳତା ପରେ ଏବେ ଏହାର ଦ୍ବିତୀୟ ଭାଗକୁ ନେଇ ଚର୍ଚ୍ଚା ଜୋର ଧରିଛି। ଫିଲ୍ମକୁ ନେଇ ଏକ ନୂଆ ଖବର ସାମ୍ନାକୁ ଆସିଛି, ଯାହା ଉତ୍ତର ଭାରତୀୟ ଲୋକଙ୍କ ପାଇଁ ଏକ ବଡ଼ ଖୁସି ଖବର। ରିପୋର୍ଟ ମୁତାବକ, ଚଳଚ୍ଚିତ୍ରର ଦ୍ବିତୀୟ ଭାଗକୁ ନେଇ ପ୍ରସ୍ତୁତି ଆରମ୍ଭ ହୋଇସାରିଛି। ନିର୍ମାତା ଫିଲ୍ମର ଦ୍ବିତୀୟ ଭାଗକୁ ଉତ୍ତର ଭାରତୀୟ ଦର୍ଶକଙ୍କୁ ଫୋକସ୍‌ରେ ରଖି ନିର୍ମାଣ କରିବେ। ତେଣୁ ପୁଷ୍ପାର ଦ୍ବିତୀୟ ଭାଗରେ ଉତ୍ତର ଭାରତ ସହ ଜଡ଼ିତ କାହାଣୀ ଦେଖିବାକୁ ମିଳିପାରେ। ଯଦିଓ ଏନେଇ ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ, କିନ୍ତୁ ଯଦି ଫିଲ୍ମକୁ ଉତ୍ତର ଭାରତ ଏବଂ ବଲିଉଡ ଦର୍ଶକଙ୍କଠାରୁ ମିଳିଥିବା ସଫଳତା ଦୃଷ୍ଟିରୁ ଦେଖାଯାଏ ତେବେ ଏହା ଘଟିବା କିଛି ଆଶ୍ଚର୍ଯ୍ୟକର ନୁହେଁ।

ଏହାବ୍ୟତୀତ ଚଳଚ୍ଚିତ୍ରର ନାମ ‘ପୁଷ୍ପା ଦି ରୁଲ୍‌’ ରଖାଯାଇଥିବା ଜଣାପଡ଼ିଛି। ଚଳଚ୍ଚିତ୍ରର ସ୍କ୍ରିପ୍ଟ ପ୍ରସ୍ତୁତ ହୋଇସାରିଛି କିନ୍ତୁ ଏବେ ଉତ୍ତର ଭାରତୀୟ ମୋଡ଼ ଆସିଥିବାରୁ ନିର୍ମାତା ସ୍କ୍ରିପ୍ଟରେ କିଛିଟା ପରିବର୍ତ୍ତନ କରିବାକୁ ଚିନ୍ତା କରିଛନ୍ତି, ଯଦ୍ବାରା ଫିଲ୍ମର ପ୍ରଭାବ ବିସ୍ତାର ହେବ। ସେହିପରି ଫିଲ୍ମର ଦ୍ୱିତୀୟ ଭାଗରେ ଅଲ୍ଲୁ ଅର୍ଜୁନଙ୍କ ଚରିତ୍ରରେ କିଛି ପରିବର୍ତ୍ତନ କରାଯାଇଛି। ଏଥିରେ ପୁଷ୍ପାଙ୍କର କିଛି ଭିନ୍ନ ଅବତାର ଦେଖିବାକୁ ମିଳିବ। ଅପରପକ୍ଷେ ଚଳଚ୍ଚିତ୍ରର କଳାକାରମାନଙ୍କ ବିଷୟରେ କହିବାକୁ ଗଲେ, ଏଥିରେ ଅଲ୍ଲୁ ଅର୍ଜୁନ ଓ ରଶ୍ମିକା ମଣ୍ଡାନାଙ୍କ ବ୍ୟତୀତ କିଛି ଲୋକପ୍ରିୟ କଳାକାର ନଜର ଆସିବେ।