ସମାଜ ଡିଜିଟାଲ ଡେସ୍କ: ସନ୍ଧ୍ୟା ସିନେମାହଲ ଦଳାଚକଟା ଘଟଣାରେ ଗିରଫ ହୋଇ ଗୋଟିଏ ରାତି ଜେଲରେ ରହିଛନ୍ତି ସାଉଥ ସୁପରଷ୍ଟାର ଅଲ୍ଲୁ ଅର୍ଜୁନ। ଶନିବାର ସେ ଜେଲରୁ ମୁକୁଳିଛନ୍ତି। ଶୁକ୍ରବାର ସନ୍ଧ୍ୟାରେ ତାଙ୍କୁ ଜାମିନ ମିଳିଥିଲେ ହେଁ କାଗଜପତ୍ର କାର୍ଯ୍ୟରେ ବିଳମ୍ବ ହେବାରୁ ତାଙ୍କୁ ଜେଲରେ ରାତି କାଟିବାକୁ ପଡ଼ିଥିଲା। ତେବେ ଅଲ୍ଲୁ ଜେଲରେ କିପରି ରାତି କାଟିଲେ ତାହା ଜାଣିବାକୁ ଅନେକଙ୍କ ମନରେ ପ୍ରଶ୍ନ ଆସୁଥିବ।
ଗିରଫ ପରେ ଅଲ୍ଲୁଙ୍କୁ ଚଞ୍ଚଲଗୁଡ଼ା କେନ୍ଦ୍ରୀୟ ଜେଲରେ ରଖାଯାଇଥିଲା। ଜେଲରୁ ମିଳିଥିବା ସୂଚନା ଅନୁସାରେ, ଏହି ଗୋଟିଏ ରାତି ପାଇଁ ଜେଲରେ ଅଲ୍ଲୁଙ୍କ ପରିଚୟ କଏଦୀ ନମ୍ବର ୭୬୯୭ ରହିଥିଲା। ସେ ଜେଲରେ ଖାଦ୍ୟ ଗ୍ରହଣ କରି ନ ଥିଲେ। ସାରା ରାତି ଉପାସ ରହିଥିଲେ ଏବଂ ଚଟାଣରେ ଶୋଇଥିଲେ। ବିଚାରାଧୀନ କଏଦୀ ହିସାବରେ ପୁଲିସ ତାଙ୍କୁ ମଞ୍ଜୀରା ବାରାକର କ୍ଲାସ-୧ କୋଠରୀରେ ରଖିଥିଲା।
