ନୂଆଦିଲ୍ଲୀ: ଦିଲ୍ଲୀସ୍ଥିତ ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ(ଏମ୍ସ)ରେ ପ୍ରଥମ ଥର ପାଇଁ ଏକକାଳୀନ ଦୁଇଟି ବୃକ୍କ ପ୍ରତିରୋପଣ(କିଡ୍ନୀ ଟ୍ରାନ୍ସପ୍ଲାଣ୍ଟ) ହୋଇଛି। ଏମ୍ସର ସର୍ଜରୀ ବିଭାଗର ପ୍ରଫେସର ଡା. ଅସୁରୀ କୃଷ୍ଣା କହିଛନ୍ତି ଯେ, ଏହା ଏକ ଜଟିଳ ଅସ୍ତ୍ରୋପଚାର ଥିଲା। ଯେଉଁଥିରେ ଅନେକ ଡାକ୍ତରଙ୍କ ଏକ ଟିମ୍ ଏକାଠି କାମ କରିଥିଲେ। ଭଲ କଥା ହେଉଛି ଅସ୍ତ୍ରୋପଚାର ସଫଳ ହୋଇଛି। ୭୮ ବର୍ଷୀୟା ଦାତାଙ୍କ ଯୋଗୁ ଏମ୍ସ ଏହି ସଫଳତା ହାସଲ କରିପାରିଛି।
୭୮ ବର୍ଷୀୟ ବୃଦ୍ଧା କିଡ୍ନୀ ଦାତା ତାଙ୍କ ଘରର ସିଡ଼ିରୁ ପଡ଼ିଯିବା ପରେ ମୁଣ୍ଡରେ ଗଭୀର ଆଘାତ ଲାଗିଥିଲା। ଏହି କାରଣରୁ ତାଙ୍କୁ ମସ୍ତିଷ୍କ ମୃତ ଘୋଷଣା କରାଯାଇଥିଲା। ଅଙ୍ଗ ଦାନ ପାଇଁ ତାଙ୍କ ପରିବାର ସମ୍ମତି ପ୍ରକାଶ କରିଥିଲେ। ବୟସାଧିକ କାରଣରୁ ଡାୟଲିସିସ୍ ରୋଗୀ ପାଇଁ ଗୋଟିଏ କିଡନୀ ପର୍ଯ୍ୟାପ୍ତ ନୁହେଁ। ତେଣୁ ସେହି ରୋଗୀର ଉଭୟ କିଡନୀ ପ୍ରତିରୋପଣ ପାଇଁ ନିଷ୍ପତ୍ତି ନିଆଯାଇଥିଲା।
ଡାକ୍ତର ଅସୁରୀ କୃଷ୍ଣା କହିଛନ୍ତି, ଚ୍ୟାଲେଞ୍ଜ ବଡ଼ ଥିଲା, କିନ୍ତୁ ସଫଳତା ହାସଲ ହୋଇଛି। ଦାତାଙ୍କ ଉଭୟ କିଡ୍ନୀ ଜଣେ ୫୧ ବର୍ଷୀୟା ମହିଳାଙ୍କଠାରେ ପ୍ରତିରୋପଣ କରାଯାଇଛି। ଡିସେମ୍ବର ୨୨, ୨୦୨୩ରେ ସର୍ଜରୀ ୟୁନିଟ୍ ୪ର ଡା. ଅସୁରୀ କୃଷ୍ଣା, ଡା. ସୁଶାନ୍ତ ସୋରେନ୍ ଏବଂ ପ୍ରଫେସର ଭି. ସିନୁଙ୍କ ଟ୍ରାନ୍ସପ୍ଲାଣ୍ଟ ଟିମ୍ ଦ୍ବାରା ଏହି ଅସ୍ତ୍ରୋପଚାର କରାଯାଇଥିଲା। ଉଭୟ କିଡନୀକୁ ଗ୍ରହୀତାଙ୍କଠାରେ ସଫଳତାର ସହ ପ୍ରତିରୋପଣ କରାଯାଇଥିଲା ଏବଂ ଅସ୍ତ୍ରୋପଚାର ପରେ ମହିଳାଙ୍କୁ ଆଉ ଡାୟଲିସିସ୍ର ଆବଶ୍ୟକତା ପଡ଼ୁନାହିଁ।
