ନୂଆଦିଲ୍ଲୀ : ଭାରତ ଏସିଆରେ ଦ୍ରୁତ ବିକାଶୋନ୍ମୁଖୀ ରାଷ୍ଟ୍ରଭାବେ ନିଜର ସ୍ଥିତି ବଜାୟ ରଖିଛି ଓ ଚଳିତ ଆର୍ଥିକ ବର୍ଷରେ ୭.୩ % ଅଭିବୃଦ୍ଧି ଲକ୍ଷ୍ୟ ହାସଲ ପାଇଁ ସଠିକ୍ ଦିଗରେ ଅଗ୍ରସର ହେଉଛି ବୋଲି ଏସୀୟ ଉନ୍ନୟନ ବ୍ୟାଙ୍କ(ଏଡିବି) କହିଛି । ଏସୀୟ ଉନ୍ନୟନ ବ୍ୟାଙ୍କ ଗୁରୁବାର ଏହାର ନୂଆ ରିପୋର୍ଟରେ କହିଛି, ଭାରତୀୟ ଅର୍ଥନୀତିର ଅଭିବୃଦ୍ଧି ହାର ୨୦୧୯ରେ ଆହୁରି ଅଧିକ ହୋଇ ଶତକଡ଼ା ୭.୬ ଭାଗ ହେବ।
ବ୍ୟାଙ୍କିଙ୍ଗ୍ ବ୍ୟବସ୍ଥାକୁ ସୁଦୃଢ଼ କରିବା ଦିଗରେ ନିଆଯାଇଥିବା ପଦକ୍ଷେପ ଓ ଟିକସରେ ସଂସ୍କାର ଯୋଗୁଁ ପୁଞ୍ଜିନିବେଶ ବୃଦ୍ଧି ପାଇବ । ରିପୋର୍ଟରେ କୁହାଯାଇଛି, ଭାରତ ନେତୃତ୍ୱରେ ଦକ୍ଷିଣ ଏସିଆ ଦ୍ରୁତ ବିକାଶୋନ୍ମୁଖୀ ଅଞ୍ଚଳ ଭାବେ ଅଗ୍ରସର ହେଉଛି। ଏସୀୟ ଉନ୍ନୟନ ବ୍ୟାଙ୍କ ମୁଖ୍ୟ ଅର୍ଥନୀତିଜ୍ଞ ୟାସୁୟୁକି ସୱାଦା କହିଛନ୍ତି, ଆମେରିକା ଓ ଏହାର ବାଣିଜ୍ୟ ଭାଗିଦାରମାନଙ୍କ ମଧ୍ୟରେ ଉତ୍ତେଜନା ବୃଦ୍ଧି ଓ ସୁରକ୍ଷାବାଦୀ ବାଣିଜ୍ୟ ନୀତି ସତ୍ତ୍ବେ ବିକାଶମୁଖୀ ଏସୀୟ ଅଞ୍ଚଳରେ ବାଣିଜ୍ୟ ବ୍ୟବସାୟରେ କୌଣସି ହ୍ରାସ ଘଟି ନାହିଁ।