ଗୋପାଳପୁର : ଜାତୀୟ ରାଜପଥ ନଂ ୧୬ ତଥା ମାଣ୍ଡିଆପଲ୍ଲୀ ଛକରେ ବୁଧବାର ଏକ ସ୍କର୍ପିଓକୁ ପଛପଟୁ ଏକ ଟ୍ରକ ଧକ୍କା ଦେଇଥିଲା। କିନ୍ତୁ ସୌଭାଗ୍ୟ ବଶତଃ ଗୋଟିଏ ପରିବାରର ସମସ୍ତ ସଦସ୍ୟ ଅଳ୍ପକେ ବର୍ତ୍ତି ଯାଇଛନ୍ତି । ଆନନ୍ଦ ପାଢ଼ୀଙ୍କ ପରିବାର ଏକ ସ୍କର୍ପିଓରେ ଗଣ୍ଡଳାରୁ କରାପଲ୍ଲୀ ଫେରୁଥିବା ବେଳେ ମାଣ୍ଡିଆପଲ୍ଲୀ ଛକଠାରେ ଆନ୍ଧ୍ରପ୍ରଦେଶର ରାଜମହେନ୍ଦ୍ରୀରୁ ଛତ୍ରପୁର ପଟକୁ ଯାଉଥିବା ଏକ ମାଲ ବୋଝେଇ ଟ୍ରକ ପଛପଟୁ ଧକ୍କା ଦେଇଥିଲା। ଫଳରେ ସ୍କର୍ପିଓଟି ପ୍ରାୟ ୧୦ ମିଟର ଦୂର ପର୍ଯ୍ୟନ୍ତ ଘୋଷାଡି ହୋଇ ଡିଭାଇଡରରେ ବାଡେଇ ହୋଇ ଅଟକି ଯାଇଥିଲା। ଯାହାଫଳରେ ସ୍କର୍ପିଓରେ ବସିଥିବା ଡ଼୍ରାଇଭର ସମେତ ଆନନ୍ଦ ପାଢ଼ୀଙ୍କ ସ୍ତ୍ରୀ ଓ ପୁଅ ଅଳ୍ପକେ ବର୍ତ୍ତି ଯାଇଥିଲେ। ଦୁର୍ଘଟଣା ପରେ ଚମାଖଣ୍ଡି ପୁଲିସ ପହଞ୍ଚି ଟ୍ରାଫିକ ନିୟନ୍ତ୍ରଣ କରିବା ସହ ଟ୍ରକ ଓ ସ୍କର୍ପିଓକୁ ଉଦ୍ଧାର କରିବା ସହ ଉଭୟ ଡ଼୍ରାଇଭରଙ୍କୁ ଥାନାରେ ଅଟକ ରଖିଛି । ଏହି ଘଟଣା ନେଇ ଥାନାରେ କୌଣସି ଲିଖିତ ଅଭିଯୋଗ ହୋଇନଥିବା ପୁଲିସ ସୂଚନା ଦେଇଛି । ଅନ୍ୟ ପଟେ ଅଧିକାଂଶ ସମୟରେ ଜାତୀୟ ରାଜପଥର ମାଣ୍ଡିଆପଲ୍ଲୀ ଛକ ଠାରେ ଛୋଟ ବଡ଼ ଦୁର୍ଘଟଣା ଘଟୁଥିବା ବେଳେ ସେଠାରେ ଟ୍ରାଫିକ ପୁଲିସ ମୁତୟନ କରିବାକୁ ସାଧାରଣରେ ଦାବି ହେଉଛି।
Comments are closed.