ଗୁରୁଡିଝାଟିଆ : ଶଙ୍ଖଯୋର ଥିଲା ମତ୍ସଜୀବୀଙ୍କ ଭାତହାଣ୍ଡି । ରାତି ପାହିଲେ ଜାଲ ଓ ଖାଳେଇ ଧରି ଗୁଜୁରାଣ ମେଣ୍ଟାଇବା ପାଇଁ ଶଙ୍ଖଯୋରରେ ମାଛମାରି ବିକ୍ରୟ କଲେ ପରିବାର ଚଳିଥାଏ । କଖଡିର ପ୍ରାୟ ୬୦ ମତ୍ସ୍ୟଜୀବୀ ପରିବାର ଶଙ୍ଖଯୋର ଉପରେ ନିର୍ଭର କରି ଚଳିଥାନ୍ତି । ହେଲେ ଯୋରରେ ଦଳ ଭର୍ତ୍ତି ହୋଇଥିବାରୁ ମତ୍ସ୍ୟଜୀବୀ ଜାଲ ଓ ଖାଳେଇକୁ ଘରେ ଟଙ୍ଗାଇ ଏବେ ମୂଲ ଲାଗୁଛନ୍ତି । ସେମାନଙ୍କ ଏଭଳି ସ୍ଥିତିରେ ପ୍ରଶାସନ ସହଯୋଗର ହାତ ବଢାଇବା ତ ଦୂରକଥା। ଦଳପୂର୍ଣ୍ଣ ଶଙ୍ଖଯୋରକୁ ଦେଖିବାକୁ ମଧ୍ୟ ଆସୁନାହାନ୍ତି । ଆଠଗଡ ନିର୍ବାଚନ ମଣ୍ଡଳୀର ଟାଙ୍ଗିଚୌଦ୍ୱାର ବ୍ଲକ ଅନ୍ତର୍ଗତ କଖଡିରେ କୈବର୍ତ୍ତ ପରିବାର ଶଙ୍ଖଯୋର ଉପରେ ନିର୍ଭରଶୀଳ। ଯୋରଟି ପ୍ରାୟ ୫ କିମି ପର୍ଯ୍ୟନ୍ତ ଲମ୍ବିଛି । ରୋହୀ ,ଭାକୁର, ମିରିକାଳି, ମାଗୁର ,ସେଉଳ, କଣ୍ଟିଆ, କେରାଣ୍ଡି, ଚିତଳ ଓ ଫଳି ପ୍ରଭୃତି ମାଛ ଦେଖାଯାଇଥାନ୍ତି । ଯୋରଟି ସାପୁଆ ଓ ମହାନଦୀ ସହିତ ସଂଯୋଗ ହୋଇଥିବାରୁ ବନ୍ୟା ସମୟରେ ମହାନଦୀ ଓ ସାପୁଆରୁ ମାଛ ଶଙ୍ଖଯୋରରେ ପଶିଥାନ୍ତି । ଫଳରେ କଖଡିର ମତ୍ସ୍ୟଜୀବୀମାନେ ମାଛମାରି ନିଜ ପରିବାରର ଗୁଜୁରାଣ ମେଣ୍ଟାଇଥାନ୍ତି । ହେଲେ ଯୋର ଜଳରାଶି ଉପରେ ଦଳ ଏପରି ଆଚ୍ଛାଦିତ ହୋଇ ରହିଛି ଯେ ମାଛ କଣ ମାରିବେ ପାଣି ଦେଖାଯାଉନାହିଁ । ଫଳରେ ମତ୍ସ୍ୟଜୀବୀ ପରିବାର ଦୁର୍ଦ୍ଦିନରେ କାଳତିପାତ କରୁଛନ୍ତି । ବାଧ୍ୟ ହୋଇ ବିଭିନ୍ନ ସ୍ଥାନକୁ ଯାଇ ଦିଜମଜୁରିଆ ଭାବେ କାମ କରି କୁଟୁମ୍ବ ପୋଷୁଛନ୍ତି । ନିଜର କୌଳିକ ବୃତ୍ତି ଏକ ପ୍ରକାର ଉଜୁଡି ଯାଇଛି । ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟିଦେଇ ଯୋରକୁ ସଫେଇ କଲେ କଖଡିର କୈବର୍ତ୍ତ ପରିବାର ସେମାନଙ୍କ କୌଳିକ ବେଉଷା କରି ଗୁଜୁରାଣ ମେଣ୍ଟାଇପାରିବେ ବୋଲି ସାଧାରଣରେ ଦାବି ହୋଇଛି ।
Comments are closed.