ଆଠଗଡ଼: ଆଠଗଡ଼ର ଅନ୍ୟତମ ଅଗ୍ରଣୀ ସ୍ୱେଚ୍ଛାସେବୀ ସଂଗଠନ ଜଷ୍ଟ ଫର ୟୁ ର ପ୍ରଥମ ବାର୍ଷିକ ଉତ୍ସବ ରବିବାର ସ୍ଥାନୀୟ ମହାବୀର ପ୍ଲାଜା ମଣ୍ଡପ ପରିସରରେ ଅନୁଷ୍ଠିତ ହୋଇଯାଇଛି। ସଂଗଠନର ସଭାପତି ସୁଧାଂଶୁ ଶେଖର ସାହୁଙ୍କ ପୌରୋହିତ୍ୟରେ ଅନୁଷ୍ଠିତ ଏହି ଉତ୍ସବରେ ମୁଖ୍ୟଅତିଥି ଭାବେ ତହସିଲଦାର ପ୍ରିୟବ୍ରତ ଦାସ ଯୋଗଦେଇ ଦେଶର ବିକାଶ କ୍ଷେତ୍ରରେ ସ୍ୱେଚ୍ଛାସେବୀ ସଂଗଠନ ଗୁଡିକର ଗୁରୁଦାୟିତ୍ୱ ରହିଛି ବୋଲି ମତବ୍ୟକ୍ତ କରିଥିଲେ। ସ୍ୱେଚ୍ଛାସେବୀ ସଂଗଠନଗୁଡିକ ପ୍ରାକୃତିକ ବିପର୍ଯ୍ୟୟ ବେଳେ ପ୍ରଶାସନ ସହିତ କାନ୍ଧକୁ କାନ୍ଧ ମିଳାଇ ଲୋକଙ୍କୁ ସେବା ଯୋଗାଇବା ଏବଂ ବିଭିନ୍ନ କୁସଂସ୍କାର ଓ ଅନ୍ଧବିଶ୍ୱାସ ବିରୋଧରେ ଜନସଚେତନତା ସୃଷ୍ଟି କରିବା ଆବଶ୍ୟକ ବୋଲି ତହସିଲଦାର ଶ୍ରୀ ଦାସ ମତ ପ୍ରକାଶ କରିଥିଲେ। ମୁଖ୍ୟବକ୍ତା ଭାବେ ଉପଖଣ୍ଡ ପୁଲିସ ଅଧିକାରୀ ବିଜୟ କୁମାର ବିସି ଯୁବପୀଢି ସମାଜସେବାକୁ ବ୍ରତଭାବେ ଗ୍ରହଣ କରିବା ପାଇଁ ଆହ୍ୱାନ ଜଣାଇଥିଲେ। ଏଥିରେ ସମ୍ମାନିତ ଅତିଥି ଭାବେ ବିଶିଷ୍ଟ ଗୀତିକାର ଓ ସଂଳାପକାର ବାପୁ ଗୋସ୍ୱାମୀ ଯୋଗଦେଇ ଜଷ୍ଟ ଫର ୟୁ ର ସେବାମୂଳକ କାର୍ଯ୍ୟ ଅନ୍ୟମାନଙ୍କ ପାଇଁ ପ୍ରେରଣା ଯୋଗାଇବ ବୋଲି ପ୍ରକାଶ କରିଥିଲେ। ଏହି ଅବସରରେ ସଂଗଠନ ପକ୍ଷରୁ ସାମ୍ବାଦିକ ଅର୍ଦ୍ଧେନ୍ଦୁ ମହାନ୍ତି, ବିଜୟ କୁମାର ନାୟକ, ସନ୍ତୋଷ କୁମାର ବାରିକ ଓ ସୁଧିରଞ୍ଜନ ଦାଶଙ୍କୁ ‘ଜଷ୍ଟ ଫର ୟୁ ମାଟିର ମହକ’ ସମ୍ମାନ ପ୍ରଦାନ କରି ସମ୍ବର୍ଦ୍ଧିତ କରାଯାଇଥିଲା। ଏଥି ସହିତ ଗାୟିକା ସୌଜନ୍ୟା ରଥ, ଏବିସିଡି ଡ୍ୟାନ୍ସଗୃପ ଓ ବିଶ୍ୱନାଥ ବିଦ୍ୟାପୀଠ ଡ୍ୟାନ୍ସଗୃପକୁ ‘ଜଷ୍ଟ ଫର ୟୁ ପ୍ରତିଭା ସମ୍ମାନ’ ପ୍ରଦାନ କରାଯାଇଥିଲା। ତତ୍ସହିତ ରାଜ୍ୟର ବିଭିନ୍ନ ଅଞ୍ଚଳରୁ ଆସିଥିବା ୧୩ଟି ସ୍ୱେଚ୍ଛାସେବୀ ସଂଗଠନକୁ ‘ଜଷ୍ଟ ଫର ୟୁ ସେବା ସମ୍ମାନ’ ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯାଇଥିଲା। ଏହି କାର୍ଯ୍ୟକ୍ରମରେ ସମାଜସେବୀ ମନୋଜ ମହାପାତ୍ର, ମାନସ ରଞ୍ଜନ ବସ୍ତିଆ, ବିଚିତ୍ରାନନ୍ଦ ସାହୁ, କୁନୁ ପୁହାଣ, ସଦାଶିବ ସାହୁ, ପିଣ୍ଟୁ ପରିଡ଼ା, ସ୍ମୃତିରଞ୍ଜନ ମହାନ୍ତି, ସରୋଜ ସ୍ୱାଇଁ, ସୂର୍ଯ୍ୟକାନ୍ତ ଭକ୍ତା, ବିପ୍ଲବ ଦାସ ଓ ଅମ୍ଲାନ ପ୍ରମୁଖଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।
Comments are closed.