ଆଠଗଡ: ଆଠଗଡ ଥାନା ଅନ୍ତର୍ଗତ ଗୋପୀନାଥପୁର ଗ୍ରାମରେ ମୁଖ୍ୟ ରାସ୍ତା କଡ ଜଣେ ବ୍ୟକ୍ତିଙ୍କ ଘରୁ ଗୁରୁବାର ରାତିରେ ଚୋରି ହୋଇଥିବା ଅଭିଯୋଗ ହୋଇଛି। ଗୋପୀନାଥପୁର ଗ୍ରାମ ନିକଟସ୍ଥ ଖୁଣ୍ଟୁଣୀ-ନରସିଂହପୁର ରାଜ୍ୟ ରାଜପଥ କଡରେ ଘର କରି ରହୁଥିବା ଅଶୋକ କୁମାର ଜେନାଙ୍କ ଘରୁ ଗତ ଚାରିମାସ ମଧ୍ୟରେ ଏହା ଦ୍ବିତୀୟବାର ଚୋରି ହୋଇଥିବା ଜଣାପଡିଛି । ଉଭୟ ଅଶୋକ ଓ ତାଙ୍କ ପତ୍ନୀ ଯଥାକ୍ରମେ ଚଣ୍ଡିଖୋଲ ଏବଂ ବାଲିଝରୀରେ ଚାକିରୀ କରନ୍ତି। ଗୁରୁବାର ସେମାନେ କୌଣସି କାରଣରୁ ଘରକୁ ଫେରିନଥିଲେ। ଏହାର ସୁଯୋଗ ନେଇ ଦୁର୍ବୃତ୍ତମାନେ ତାଙ୍କ ଘରର ଏକାଧିକ ତାଲା ଭାଙ୍ଗି ଗୋଟିଏ ସୁନା ଚେନ ଓ ଦୁଇଟି ସୁନା ମୁଦି ସହ ସିସିଟିଭି କ୍ୟାମେରା ଏବଂ ହାର୍ଡ ଡିସ୍କ ଆଦି ଚୋରି କରି ନେଇଥିବା ସେମାନେ ଘରକୁ ଫେରି ଦେଖିଥିଲେ । ଗତ ଜୁନ ୧୯ ତାରିଖ ରାତିରେ ମଧ୍ୟ ଅନୁରୂପ ଭାବେ ତାଙ୍କ ଘରୁ ଦୁର୍ବୃତ୍ତମାନେ ସ୍ମାର୍ଟ ଟିଭି, ଇନଭରଟର ଓ ନଗଦ ୫୦ ହଜାର ଟଙ୍କା ଲୁଟି ନେଇଥିଲେ । ସେ ସମୟରେ ସେ ଆଠଗଡ ଥାନାରେ ଏତଲା ଦେଇଥିଲେ ମଧ୍ୟ କୌଣସି ସୁଫଳ ମିଳିନାହିଁ । ଗୁରୁବାର ଚୋରି ସମ୍ପର୍କରେ ପୁନର୍ବାର ଅଶୋକ ଥାନାରେ ଲିଖିତ ଅଭିଯୋଗ କରିଛନ୍ତି। ପୁଲିସ ତଦନ୍ତ ଜାରି ରହିଛି ବୋଲି ଆଇଆଇସି ଅନିରୁଦ୍ଧ ମୁଦୁଲିଙ୍କ ସୂତ୍ରରୁ ଜଣାପଡିଛି ।
ଜାଣନ୍ତୁ ଟପ୍ ୧୦ ତାଲିକା; ଦୁନିଆରେ ସବୁଠାରୁ ଅଧିକ ବିକ୍ରି ହୋଇଛି ଏହି ସ୍ମାର୍ଟଫୋନ୍..
