ପାଟନା . – ବିହାରରେ ଜଙ୍ଗଲରାଜର ଆଉ ଏକ ଘଟଣା ଦେଖିବାକୁ ମିଳିଛି । ଅପରାଧିମାନେ ଆଇନକାନୁନର ଭୟ ଛାଡି ଗୋଟିଏ ପରିବାର ୩ ଜଣଙ୍କୁ ହତ୍ୟାକରିଛନ୍ତି । ଗୋଟିଏ ପରିବାରର ମୁଖ୍ୟଙ୍କୁ ହତ୍ୟାକରିବାର କିଛି ଦିନ ପରେ ତାଙ୍କର ଦୁଇ ପୁଅଙ୍କୁ ଶୋଇଥିବା ଅବସ୍ଥାରେ ଗୁଳି କରି ହତ୍ୟା କରିଛନ୍ତି । ଏବେବି ପିତାଙ୍କ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ଫେରାର ରହିଛି । ବିହାରର ହାଜିପୁରରେ ଏହି ଘଟଣା ଘଟିଛି ।
ହାଜିପୁରରେ ଏହି ଘଟଣା ଚାଞ୍ଚଲ୍ୟ ସୃଷ୍ଟି କରିଛି । ହତ୍ୟାର ଶିକାର ହୋଇଥିବା ଦୁଇ ଭାଇଙ୍କ ନାମ ଚଞ୍ଚଲ ସିଂ ଓ ରାଡ ରୋଶନ ସିଂ . ବିଦ୍ୟୁତ କଟିଯାଇଥିବାରୁ ଏମାନେ ଘର ନିକଟସ୍ଥ ଏକ ମନ୍ଦିର ପରିସରରେ ଥିବା ଛାତ ଉପରେ ଶୋଇଥିଲେ । ଏହି ଦୁଇ ଭାଇ ତାଙ୍କ ବାପାଙ୍କ ହତ୍ୟାକାଣ୍ଡର ସାକ୍ଷୀ ଥିଲେ । ଏକ ଜମି ଜମା ବିବାଦରୁ ତାଙ୍କୁ ମାସେ ତଳେ ଗୁଳି କରି ହତ୍ୟା କରାଯାଇଥିଲା ।
ପୁଲିସ ଏହି ଅଭିଯୋଗ ପାଇବାପରେ ଜଣେ ବ୍ୟକ୍ତିଙ୍କୁ ଗିରଫ କରିଛି । ଏହି ଘଟଣାର ମୁଖ୍ୟ ଅଭିଯୁକ୍ତମାନେ ଏବେ ବି ଫେରାର ଅଛନ୍ତି । ପରିବାର ଲୋକ ତାଙ୍କର ସମ୍ପର୍କୀୟ ଭାଇ ବିବେକ ଓ ଅଭିଷେକ ସିଂକୁ ଏହି ହତ୍ୟାକାଣ୍ଡ ପାଇଁ ଦାୟୀ କରିଛନ୍ତି। ଏମାନଙ୍କ ସହ ଆଉ ତିନି ଜଣ ଦୁର୍ବୃତ୍ତ ଥିଲେ ବୋଲି ପରିବାର ଲୋକ ଅଭିଯୋଗ କରିଛନ୍ତି । ଏହି ଦୁଇ ଜଣ ତାଙ୍କ ବାପାଙ୍କୁ ବି ହତ୍ୟା କରିଥିବା ଅଭିଯୋଗ ହୋଇଥିଲା ।
