ଚଣ୍ଡିଗଡ଼ : ଅଭିନେତା ରାହୁଲ ବୋଷଙ୍କଠାରୁ ୨ଟି କଦଳୀ ପାଇଁ ୪୪୨.୫୦ ଟଙ୍କା ନେବା ଜେଡବ୍ଲ୍ୟୁ ମାରିଅଟ୍ ହୋଟେଲକୁ ଭାରି ପଡ଼ିଛି। ଚଣ୍ଡିଗଡ଼ର ଉତ୍ପାଦ ଶୁଳ୍କ ଓ ଟିକସ ବିଭାଗ ପକ୍ଷରୁ ହୋଟେଲ ନାଁରେ ୨୫ ହଜାର ଟଙ୍କାର ଜୋରିମାନା ଲଗାଯାଇଛି। ହୋଟେଲ ରାହୁଲଙ୍କଠାରୁ କର ମୁକ୍ତ ସାମଗ୍ରୀ ଉପରେ ବେଆଇନ ଭାବେ ଜିଏସ୍ଟି ଆଦାୟ କରିଥିଲା। ନିକଟରେ ରାହୁଲ ଉକ୍ତ ଘଟଣାର ଏକ ଭିଡିଓ କରି ସାମାଜିକ ଗଣମାଧ୍ୟମରେ ଶେୟାର କରିବା ପରେ ଏହାକୁ ନେଇ ଖୁବ୍ ଚର୍ଚ୍ଚା ହୋଇଥିଲା।
ଉଲ୍ଲେଖଯୋଗ୍ୟ, ଚଣ୍ଡିଗଡ଼ରେ ଥିବା ପଞ୍ଚତାରକା ହୋଟେଲ୍ ଜେଡବ୍ଲ୍ୟୁ ମାରିଅଟ୍ରେ ରାହୁଲ୍ ବୋଷ ରହିଥିଲେ। ସେ ବ୍ୟାୟାମଶାଳାରେ ବ୍ୟାୟାମ କରିବା ସମୟରେ ଦୁଇଟି ପାଚିଲା କଦଳୀ ପାଇଁ ବରାଦ ଦେଇଥିଲେ। ଦୁଇଟି ପାଚିଲା କଦଳୀ ପାଇଁ ତାଙ୍କୁ ୪୪୨.୫୦ ଟଙ୍କା ଦେବାକୁ ପଡ଼ିଥିଲା। କେବଳ ସେତିକି ନୁହେଁ ବିଲ୍ରେ ଷ୍ଟେଟ୍ ଜିଏସ୍ଟି ଓ ସେଣ୍ଟ୍ରାଲ୍ ଜିଏସ୍ଟି ବିଷୟରେ ଉଲ୍ଲେଖ ଥିଲା।
ରାହୁଲ ଟ୍ୱିଟରରେ ଏହାର ଏକ ଭିଡିଓ କରି ଶେୟାର କରିବା ପରେ ପୋଷ୍ଟଟି ଭାଇରାଲ୍ ହୋଇଥିଲା। କେତେକ ଟ୍ୱିଟର ବ୍ୟବହାରକାରୀ ତାଙ୍କୁ ହୋଟେଲ୍ରେ ଏହି ପ୍ରସଙ୍ଗର ସମାଧାନ କରିବାକୁ ପରାମର୍ଶ ଦେଇଥିବା ବେଳେ ଅନ୍ୟ କେତେଜଣ ଗୋଟିଏ କୋଠରୀ ପାଇଁ ହଜାର ହଜାର ଟଙ୍କା ଦେଇଥିବା ବେଳେ କଦଳୀ ପାଇଁ ଏତିକି ଟଙ୍କା କ’ଣ ବେଶୀ ହୋଇଗଲା ବୋଲି ପ୍ରଶ୍ନ କରିଥିଲେ। ଏହାପରେ ଚଣ୍ଡିଗଡ଼ ଉତ୍ପାଦ ଶୁଳ୍କ ଓ ଟିକସ ବିଭାଗ ଉପ କମିଶନର ଏହାର ତଦନ୍ତ ନିର୍ଦେଶ ଦେଇଥିଲେ। ତାଜା ଫଳ ଓ ପନିପରିବା ଉପରେ ଜିଏସ୍ଟି ଲାଗୁ କରାଯାଇ ନଥିବା ବେଳେ ହୋଟେଲରେ କେଉଁ ପରିସ୍ଥିତିରେ ଜିଏସ୍ଟି ଆଦାୟ କରାଗଲା ସେ ବିଷୟରେ ତଦନ୍ତ କରିବା ପାଇଁ ସେ କହିଥିଲେ।
