ବେଲଗାଁ : ବେଲଗାଁରେ ଗତକାଲି ବିଲମ୍ବିତ ରାତ୍ରିରେ ଜଣେ ଟ୍ରକ ଡ୍ରାଇଭରଙ୍କୁ ଦୁର୍ବୃତ୍ତ ଚାକୁ ମାରି ଲୁଟ ଉଦ୍ୟମ କରିଥିବା ଅଭିଯୋଗ ହୋଇଛି। ଆହତ ଡ୍ରାଇଭର ଜଣକୁ ବେଲଗାଁ ପୁଲିସ ଉଦ୍ଧାର କରି ପ୍ରଥମେ ବେଲଗାଁ ସେଠାରୁ ସଇଁନ୍ତଲା ନେଇ ଚିକିତ୍ସା ବ୍ୟବସ୍ଥା କରିଥିବା ଜଣାଯାଇଛି। ସୁଚନାରୁ ପ୍ରକାଶ ଯେ, ଗତ ରାତି ପ୍ରାୟ ୩ଟା ସମୟରେ ବେଲଗାଁ ଏନ୍ଏଚ୍ ବଙ୍ଗଳା ନିକଟରେ ନିଜ ଟ୍ରକ ରଖି ଶୋଇଥିବା ଲାଇନ ଟ୍ରକ ଡ୍ରାଇଭର ରଞ୍ଜିତ ସିଂଙ୍କୁ ୪ରୁ୫ ଜଣ ଦୁର୍ବୃତ୍ତ ଆକ୍ରମଣ କରିଥିଲେ। ରଞ୍ଜିତ ପଞ୍ଜାବ ରାଜ୍ୟର ବାସିନ୍ଦା ହୋଇଥିବା ବେଳେ ସେ ବିଶାଖାପାଟଣାରୁ କୋଇଲା ନେଇ ଚାରିଛକ ଯାଉଥିବା କହିଛନ୍ତି। ତାଙ୍କ କହିବାନୁଯାୟୀ ପ୍ରଥମେ ଦୁର୍ବୃତ୍ତ ଟ୍ରକର ଗେଟ କାଚକୁ ପଥର ମାଡ କରି ଭାଙ୍ଗିଦେଇ ଭିତରୁ ତାଙ୍କୁ ଟାଣି ଆଣିଥିଲେ। ଉକ୍ତ ପଥର ମାଡରେ ଡ୍ରାଇଭରଙ୍କ ମୁଣ୍ଡ ଫାଟିଯାଇଥିଲା। ଏନେଇ ସେ ପ୍ରତିରୋଧ କରିବାରୁ ଦୁର୍ବୃତ୍ତ ଏକ ଚାକୁରେ ତାଙ୍କୁ ହତ୍ୟା କରିବାକୁ ଉଦ୍ୟମ କରିଥିବା ଜଣାଯାଇଛି। ଚାକୁଟି ତାଙ୍କ ବାମ ହାତରେ ବାଜିବାରୁ ସେ ଅଳ୍ପକେ ରକ୍ଷା ପାଇଯାଇଥିଲେ। ଭୟଭିତ କରି ଦୁର୍ବୃତ୍ତ ରଞ୍ଜିତଙ୍କ ପାଖରେ ଥିବା ୫ ହଜାର ଟଙ୍କା ନେଇଯାଇଥିବା ପ୍ରକାଶ। ସାଙ୍ଗରେ ଥିବା ହେଲପର ଜଣକ ବେଲଗାଁ ପୁଲିସ ଫାଣ୍ଡିକୁ ଯାଇଁ ଆକ୍ରମଣ ବିଷୟରେ ଖବର ଦେଇଥିଲେ। ତେବେ ପୁଲିସ ପହଞ୍ଚିବା ପୁର୍ବରୁ ଦୁର୍ବୃତ୍ତମାନେ ଫେରାର ହେବାକୁ ସକ୍ଷମ ହୋଇଥିବା ଜଣାଯାଇଛି।
Popular Categories
Previous article
Next article