ନୂଆଦିଲ୍ଲୀ : ବିଜେପି ଅଧ୍ୟକ୍ଷ ଅମିତ ଶାହାଙ୍କୁ ନରେନ୍ଦ୍ର ମୋଦୀଙ୍କ ଦ୍ବିତୀୟ ପାଳି ସରକାରରେ ସ୍ବରାଷ୍ଟ୍ର ମନ୍ତ୍ରଣାଳୟ ଦାୟିତ୍ବ ମିଳିଛି। ସାଧାରଣତଃ ସ୍ବରାଷ୍ଟ୍ର ମନ୍ତ୍ରୀଙ୍କୁ ସରକାରର ଦ୍ବିତୀୟ କ୍ଷମତା କେନ୍ଦ୍ର ବୋଲି ବିବେଚନା କରାଯାଏ। ଯଦିଓ ଏ ନେଇ କିଛି ଲିଖିତ ନିୟମ ନାହିଁ; ତଥାପି ପରମ୍ପରା ଅନୁଯାୟୀ ସ୍ବରାଷ୍ଟ୍ର ମନ୍ତ୍ରୀ ଦ୍ବିତୀୟ କ୍ଷମତା କେନ୍ଦ୍ର ଭୋଗ କରିଥାନ୍ତି। ୨୦୧୯ ଲୋକସଭା ନିର୍ବାଚନରେ ବିଜେପିର ବିପୁଳ ବିଜୟର ଶ୍ରେୟ ନରେନ୍ଦ୍ର ମୋଦୀ ଓ ଅମିତ ଶାହାଙ୍କୁ ଦିଆଯାଉଛି। ଏହି କାରଣରୁ ଶାହାଙ୍କୁ ସ୍ବରାଷ୍ଟ୍ର ମନ୍ତ୍ରଣାଳୟ ଭଳି ଗୁରୁତ୍ବପୂର୍ଣ୍ଣ ବିଭାଗ ଦିଆଯାଇଛି।
ଏହା ସହିତ ମୋଦୀ ଗୁଜରାଟ ମୁଖ୍ୟମନ୍ତ୍ରୀ ଥିବା ସମୟରେ ଶାହାଙ୍କୁ ଗୃହ ମନ୍ତ୍ରୀ ରଖିଥିଲେ। ତେଣୁ ବିଗତ ଦିନରୁ ଶାହାଙ୍କ ସହିତ ମୋଦୀଙ୍କର ଘନିଷ୍ଠତା ଓ ବିଶ୍ବସନୀୟତା ରହି ଆସିଥିବାରୁ ତାଙ୍କୁ ଏବେ ଏହି ଗୁରୁତ୍ବପୂର୍ଣ୍ଣ ବିଭାଗ ଦିଆଯାଇଥିବା ଜଣାଯାଇଛି। ଏବେ ଶାହାଙ୍କୁ ସ୍ବରାଷ୍ଟ୍ର ମନ୍ତ୍ରଣାଳୟ ଦାୟିତ୍ବ ଦିଆଯାଇଥିବାବେଳେ ପୂର୍ବରୁ ଏହି ଦାୟିତ୍ବରେ ଥିବା ରାଜନାଥ ସିଂହଙ୍କୁ ପ୍ରତିରକ୍ଷା ମନ୍ତ୍ରଣାଳୟ ଦିଆଯାଇଛି। ତେଣୁ ସରକାରରେ ଦ୍ବିତୀୟ କ୍ଷମତା କେନ୍ଦ୍ରକୁ ନେଇ ରାଜନାଥ ଓ ଶାହାଙ୍କ ମଧ୍ୟରେ ବିବାଦ ଦେଖାଯିବାର ସମ୍ଭାବନା ରହିଛି। ୨୦୧୪ ସରକାର ସମୟରେ ଦ୍ବିତୀୟ କ୍ଷମତା କେନ୍ଦ୍ରକୁ ନେଇ ରାଜନାଥ ଓ ଅରୁଣ ଜେଟଲୀଙ୍କ ମଧ୍ୟରେ ବିବାଦ ଦେଖାଯାଇଥିଲା। ତେବେ କ୍ୟାବିନେଟ ବୈଠକରେ ମୋଦୀଙ୍କ ପାଖରେ ରାଜନାଥ ବସୁଥିବାବେଳେ ତାଙ୍କ ପାଖକୁ ଜେଟଲୀ ବସୁଥିଲେ।
Comments are closed.