ଇସଲାମାବାଦ : ଆମେରିକା ଗୁରୁବାର ୫୨ ପାକିସ୍ତାନୀ ନାଗରିକଙ୍କୁ ନିଜ ଦେଶକୁ ପଠାଇ ଦେଇଛି। ଏହି ପ୍ରବାସୀମାନେ କଡ଼ା ସୁରକ୍ଷା ମଧ୍ୟରେ ସ୍ୱତନ୍ତ୍ର ବିମାନ ଯୋଗେ ପାକିସ୍ତାନର ରାଜଧାନୀ ଇସଲାମାବାଦରେ ପହଞ୍ଚିଛନ୍ତି।
ପାକିସ୍ତାନ ବିଦେଶମନ୍ତ୍ରୀ ଶାହା ମହମ୍ମଦ କ୍ୟୁରେସୀ ପାକିସ୍ତାନ ନ୍ୟାସନାଲ ଆସେଂବ୍ଲିରେ କହିଛନ୍ତି ଯେ ଆମେରିକା ଅଧିକାରୀମାନେ ପ୍ରବାସୀ ନିୟମ ଉଲ୍ଲଙ୍ଘନ, ଅପରାଧିକ ଆଚରଣ ଏବଂ ଅନ୍ୟ ଗୁରୁତର ଅଭିଯୋଗରେ କେତେକ ପାକିସ୍ତାନ ନାଗରିକଙ୍କୁ ଗିରଫ କରି ମୋକଦ୍ଦମା ଚଳାଇଥିଲା।
ପାକିସ୍ତାନର ‘ଡନ’ ଖବରକାଜରେ ପ୍ରକାଶିତ ରିପୋର୍ଟ ଅନୁସାରେ ୫୩ ପାକିସ୍ତାନୀଙ୍କୁ ସ୍ୱଦେଶ ଫେରିବାର ଥିଲା, କିନ୍ତୁ ଗୁରୁବାର ୫୨ ଜଣ ନାଗରିକ ସ୍ୱଦେଶରେ ପହଞ୍ଚିଛନ୍ତି। ବିମାନ ବନ୍ଦରରେ ଅସୁସ୍ଥ ହୋଇପଡ଼ିବାରୁ ଜଣେ ପାକିସ୍ତାନୀ ନାଗରିକ ସ୍ୱଦେଶ ଫେରିପାରିନାହାନ୍ତି।
ସୂଚନା ଅନୁସାରେ ଟ୍ରମ୍ପ ପ୍ରଶାସନ ଭିସା ଅବଧି ଶେଷ ହେବା ପରେ ବି ଆମେରିକାରେ ରହୁଥିବା ବିଦେଶ ନାଗରିକଙ୍କୁ ଧରି ଦେଶାନ୍ତର କରୁଛି। ଏହି କ୍ରମରେ ଧାର୍ଯ୍ୟ ସମୟଠାରୁ ଅଧିକ ଦିନ ହେବ ଆମେରିକାରେ ରହୁଥିବା ୫୨ ପାକିସ୍ତାନୀଙ୍କୁ ଦେଶାନ୍ତର କରାଯାଇଛି। ଏପରିକି ଆମେରିକା ପାକିସ୍ତାନର ଅତିରିକ୍ତ ସଚିବ, ଗୃହ ମନ୍ତ୍ରାଳୟର ଜଣେ ଯୁଗ୍ମ ସଚିବ ଏବଂ ପାସପୋର୍ଟ ମହାନିର୍ଦେଶକଙ୍କୁ ଭିସା ଦେବାକୁ ମନା କରିଦେଇଛି।
ଅନ୍ୟ ଏକ ଘଟଣା କ୍ରମେ ଏକ ସ୍ୱତନ୍ତ୍ର ବିମାନ ଯୋଗେ ଗ୍ରୀସରୁ ସ୍ୱଦେଶକୁ ଫେରିଥିବା ପାକିସ୍ତାନ ନାଗରିକଙ୍କୁ ଇସଲାମାବାଦ ଅନ୍ତର୍ଜାତୀୟ ବିମାନ ବନ୍ଦରରେ ଗିରଫ କରାଯାଇଛି। ସେମାନଙ୍କ ବିରୋଧରେ ମାମଲା ରୁଜୁ କରାଯାଇଛି। ଏହି ପାକିସ୍ତାନୀ ନାଗରିକମାନେ ବେଆଇନ ଭାବେ ଗ୍ରୀସରେ ପ୍ରବେଶ କରିଥିଲେ। ଗ୍ରୀସ ସେମାନଙ୍କୁ ଗିରଫ କରି ସ୍ୱଦେଶକୁ ଫେରାଇ ଦେଇଛି।
Comments are closed.