ନୂଆଦିଲ୍ଲୀ: ଭାରତର ବିଶିଷ୍ଟ ଶିଳ୍ପପତି ନୁସ୍ଲି ୱାଡିୟା ତଥା ୱାଡିୟା ଗ୍ରୁପ୍ର ଉତ୍ତରାଧିକାରୀ ନେସ୍ ୱାଡିୟାଙ୍କୁ ଜାପାନର ଏକ କୋର୍ଟ ୨ବର୍ଷ ଦଣ୍ଡାଦେଶ ଶୁଣାଇଛନ୍ତି। ପାଖରେ ନିଶାଦ୍ରବ୍ୟ ରଖିବା ମାମଲାରେ ନେସ୍ ୱାଡିୟାଙ୍କୁ ଗତ ମାର୍ଚ୍ଚରେ ଜାପାନ ପୁଲିସ ଗିରଫ କରିଥିଲା। ନେସ୍ ୱାଡିୟା ଆଇପିଏଲରେ ଭାଗଦେଇଥିବା କିଙ୍ଗ୍ସ ଏକାଦଶ ପଞ୍ଜାବ ଟିମ୍ର ଅନ୍ୟତମ ମାଲିକ ଅଟନ୍ତି।
ସୂଚନା ମୁତାବକ, ନେସ୍ ୱାଡିୟା ଜାପାନ ଯାଇଥିବାବେଳେ ନ୍ୟୁ ଚିଟୋଜ ବିମାନବନ୍ଦରରେ ଯାଞ୍ଚ ବେଳେ ତାଙ୍କଠାରୁ ଗଞ୍ଜେଇ ଭଳି କିଛି ନିଶାଦ୍ରବ୍ୟ ମିଳିଥିଲା। ଏହା ପରେ ତାଙ୍କୁ ନାର୍କୋଟିକ୍ସ ବିଭାଗ ଗିରଫ କରିଥିଲା। ଏ ନେଇ ନେସ୍ ୱାଡିୟାଙ୍କ ବିରୋଧରେ କୋର୍ଟରେ ମାମଲା ଚାଲିଥିଲା। ସାପୋରୋ ଜିଲା କୋର୍ଟ ମାମଲାର ଶୁଣାଣି କରି ତାଙ୍କୁ ୨ବର୍ଷ ଜେଲ୍ ଦଣ୍ଡାଦେଶ ଶୁଣାଇଛନ୍ତି। ଏ ନେଇ ଫାଇନାନ୍ସିଆଲ ଟାଇମ୍ସ ପକ୍ଷରୁ ଏକ ରିପୋର୍ଟ ପ୍ରକାଶ ପାଇଛି।
ସୂଚନାଯୋଗ୍ୟ, ୱାଡିୟା ଗ୍ରୁପ୍ର ଅନେକ ବ୍ୟବସାୟିକ ସଂସ୍ଥା ରହିଛି। ସେଥିମଧ୍ୟରୁ ବମ୍ବେ ଡାଇଂ, ବମ୍ବେ ବର୍ମାନ ଟ୍ରେଡିଂ, ବ୍ରିଟାନିଆ ଇଣ୍ଡଷ୍ଟ୍ରିଜ, ଗୋ ଏୟାର ଅନ୍ୟତମ।
