ନୂଆଦିଲ୍ଲୀ: ୨୦୧୯ ଲୋକସଭା ନିର୍ବାଚନର ୪ର୍ଥ ପର୍ଯ୍ୟାୟରେ ୭୧ ଆସନ ପାଇଁ ଭୋଟଗ୍ରହଣ ଶେଷ ହୋଇଛି । ରାଜନୀତି ମଇଦାନରେ ନେତା ପରସ୍ପରଙ୍କୁ କଡା ଟକ୍କାର ଦେଉଥିବା ବେଳେ ବଲିଉଡ୍ ଅଭିନେତା ଓ ଅଭିନେତ୍ରୀମାନେ ମଧ୍ୟ ନିଜର ମତାଧିକାର ସାବ୍ୟସ୍ତ କରିଛନ୍ତି । ଅମିତାଭ ବଚ୍ଚନଙ୍କଠାରୁ ଆରମ୍ଭ କରି ସଲମନ ଖାନଙ୍କ ପର୍ଯ୍ୟନ୍ତ ପ୍ରାୟ ସମସ୍ତେ ଶୁକ୍ରବାର ବିଭିନ୍ନ ବୁଥରେ ମତଦାନ କରିଥିବା ଦେଖିବାକୁ ମିଳିଥିଲା । କିନ୍ତୁ ବଲିଉଡ୍ ଜଗତରେ ଏଭଳି କିଛି ଅଭିନେତା ଓ ଅଭିନେତ୍ରୀ ଅଛନ୍ତି, ଯେଉଁମାନେ ଭାରତର ରହି ମଧ୍ୟ ମତଦାନ କରିବାର ଅଧିକାର ପାଇନାହାନ୍ତି । ତେବେ ଆସନ୍ତୁ ଜାଣିବା ସେଭଳି କିଛି ବଲିଉଡ ତାରକାମାନଙ୍କ ବିଷୟରେ….
ଏହି ତାଲିକାର ପ୍ରଥମ ସ୍ଥାନରେ ରହିଛନ୍ତି ଅକ୍ଷୟ କୁମାର । ଅକ୍ଷୟ ଭାରତରେ ରହି ମଧ୍ୟ କାନାଡା ନାଗରିକତ୍ବର ଅଧିକାର ପାଇଛନ୍ତି । ଏହା ସହ ତାଙ୍କର ପାସପୋର୍ଟ କାନାଡାରୁ ପଞ୍ଜିକୃତ ହୋଇଛି । କାନାଡର ୱିଣ୍ଡସର ବିଶ୍ବବିଦ୍ୟାଳୟରୁ ତାଙ୍କୁ ଆଇନରେ ସମ୍ମାନସୂଚକ ଡକ୍ଟରେଟ୍ ଡିଗ୍ରୀ ମିଳିଛି । ତେଣୁ ଅକ୍ଷୟ କୁମାରଙ୍କ ନାମ ମତଦାନ ତାଲିକାରୁ ବାଦ୍ ପଡିଛି ।
ଆଲିଆ ଭଟ୍ଟଙ୍କ ନିକଟରେ ଭାରତର ନାଗରିକତା ଅଧିକାର ନାହିଁ । ଆଲିଆ ଭଟ୍ଟଙ୍କ ମା’ ସୋନୀ ରାଜଦାନ ବିର୍ମିଂହମରୁ ହୋଇଥିବାରୁ ତାଙ୍କ ନିକଟରେ ବ୍ରିଟିଶ ନାଗରିକତାର ଅଧିକାର ରହିଛି । ଏହି କାରଣରୁ ଆଲିଆ ଭଟ୍ଟଙ୍କ ନିକଟରେ ବ୍ରିଟିଶ ପାସପୋର୍ଟ ରହିଛି ।
କ୍ୟାଟ୍ରିନା କୈଫଙ୍କ ନିକଟର ବ୍ରିଟିଶ ନାଗରିକତ୍ବ ଅଧିକାର ଥିବାରୁ ସେ ମଧ୍ୟ ମତଦାନରୁ ବଞ୍ଚିତ ହୋଇଛନ୍ତି ।
ଶ୍ରୀଲଙ୍କା ସୁନ୍ଦରୀ ତଥା ଅଭିନେତ୍ରୀ ଜ୍ୟାକଲିନ ଫର୍ନାଣ୍ଡିସଙ୍କ ଜନ୍ମ ବହାରିନର ମନାମାରେ ହୋଇଥିଲା । ତେଣୁ ତାଙ୍କ ନିକଟରେ ଶ୍ରୀଲଙ୍କାର ନାଗରିକତ୍ବର ଅଧିକାର ରହିଛି ।
‘ରକ୍ ଷ୍ଟାର’ ଫିଲ୍ମରୁ ହିଟ୍ ହୋଇଥିବା ଅଭିନେତ୍ରୀ ନର୍ଗିସ ପକ୍ରୀ ଭାରତରେ ରହି ମଧ୍ୟ ଭୋଟ ଦେଇ ପାରିନାହାନ୍ତି । ନର୍ଗିସଙ୍କ ଜନ୍ମ ନ୍ୟୁୟର୍କରେ ହୋଇଛି । ତେଣୁ ତାଙ୍କ ପାଖରେ ଆମେରିକାର ପାସପୋର୍ଟ ଏବଂ ନାଗରିକତ୍ବର ଅଧିକାର ରହିଛି ।
ବଲିଉଡ ଅଭିନେତା ତଥା ଅମୀର ଖାନଙ୍କ ଭଣଜା କୁହାଯାଉଥିବା ଇମରାନ ଖାନଙ୍କ ଜନ୍ମ ଆମେରିକାର ୱିସ୍କନସିନ୍ ସହରର ଜନ୍ମ ହୋଇଥିଲେ । କିନ୍ତୁ ମା-ବାପାଙ୍କ ବିବାହ ବିଚ୍ଛେଦ ପରେ ତାଙ୍କୁ କାଲିଫର୍ନିଆ ଯିବାକୁ ପଡିଥିଲା । ସେଠାରେ ସେ ପାଠ ପଢା ଶେଷ କରିଥିଲେ । ତେଣୁ ତାଙ୍କ ନିକଟରେ ଆମେରିକାର ନାଗରିକତ୍ବ ଏବଂ ପାସପୋର୍ଟ ରହିଛି ।
