ନୂଆଦିଲ୍ଲୀ: କୌଣସି ବେସରକାରୀ କମ୍ପାନୀକୁ ଟିକସ ରିହାତି ସହ ରାଫେଲ୍ ବିମାନ ଚୁକ୍ତିର କୌଣସି ସମ୍ପର୍କ ନାହିଁ ଏବଂ ଲୋକମାନଙ୍କୁ ଭୁଲ୍ ତଥ୍ୟ ଦେବାପାଇଁ ଏଭଳି ମନ୍ଦ ଉଦ୍ୟମ କରାଯାଉଛି ବୋଲି ପ୍ରତିରକ୍ଷା ମନ୍ତ୍ରାଳୟ କହିଛି। ଫ୍ରାନ୍ସରୁ ପ୍ରକାଶିତ ‘ଲେ ମଣ୍ଡେ’ ସମ୍ବାଦପତ୍ରରେ ପ୍ରକାଶିତ ରିପୋର୍ଟ ଅନୁଯାୟୀ, ରାଫେଲ୍ ଚୁକ୍ତି ସମୟରେ ଅନିଲ୍ ଅମ୍ବାନୀଙ୍କ ଫ୍ରାନ୍ସରେ ଥିବା କମ୍ପାନୀକୁ ଫ୍ରାନ୍ସ ପକ୍ଷରୁ ପାଖାପାଖି ୧୪୪ ନିୟୁତ ୟୁରୋ ଶୁଳ୍କ ଛାଡ଼ କରାଯାଇଛି। ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଏକ ବିବୃତ୍ତିରେ କୁହାଯାଇଛି, ଏକ ବେସରକାରୀ କମ୍ପାନୀକୁ ଟିକସ ଛାଡ଼ ଏବଂ ରାଫେଲ୍ ବିମାନ କ୍ରୟ ଚୁକ୍ତି ମଧ୍ୟରେ କୌଣସି ସମ୍ପର୍କ ନାହିଁ। ଟିକସ ଛାଡ଼ର ସମୟ ଏବଂ ବର୍ତ୍ତମାନର ଏନ୍.ଡି.ଏ. ସରକାରଙ୍କ କାର୍ଯ୍ୟକାଳ ସମୟକୁ ରାଫେଲ୍ ଚୁକ୍ତି ସହ ପିଛିଲା ଭାବେ ଯୋଡ଼ାଯିବା ଅନୁଚିତ।
ଏହି ଘଟଣାରେ କଂଗ୍ରେସ ସମାଲୋଚନା କରି କହିଛି, ରାଫେଲ ଦୁର୍ନୀତିର ତଥ୍ୟ ପ୍ରକାଶ ପାଇବାରେ ଲାଗିଛି। ରାଫେଲ୍ ଚୁକ୍ତିରେ ଦୁର୍ନୀତିର ସ୍ତର ଓ କାହାକୁ ଅର୍ଥ ଦିଆଯାଇଛି, ତାହା ପଦାରେ ପଡ଼ିଯାଇଛି। ଦଳୀୟ ମୁଖପାତ୍ର ରଣଦୀପ ସୁରଜେଵାଲା କହିଛନ୍ତି, ଏନ୍.ଡି.ଏ. ସରକାର ରାଫେଲ୍ କ୍ରୟ ଚୁକ୍ତିରେ ସ୍ୱାକ୍ଷର କରିବା ପରେ ସେହି ଟିକସ ଛାଡ଼ କରାଯାଇଥିଲା। ତେଣୁ ରାଫେଲ୍ ଲଢ଼ୁଆ ବିମାନ କ୍ରୟ କ୍ଷେତ୍ରରେ ଟଙ୍କା ଦେଣନେଣ ହୋଇଥିବାର ଏହା ସ୍ପଷ୍ଟ ପ୍ରମାଣ ନୁହେଁ କି ବୋଲି ସେ ପ୍ରଶ୍ନବାଚୀ ଉଠାଇଛନ୍ତି।
