ଭୁବନେଶ୍ବର : ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ପରିଚାଳିତ ଯୁକ୍ତ ଦୁଇ ପରୀକ୍ଷା ମାର୍ଚ୍ଚ ୩୦ରେ ଶେଷ ହୋଇଛି। ପରୀକ୍ଷା ସରିବା ପରେ ମୂଲ୍ୟାୟନ ତାରିଖକୁ ନେଇ ପରିଷଦ ପକ୍ଷରୁ ବାରମ୍ବାର ବୈଠକ କରାଯାଇଥିଲେ ମଧ୍ୟ ତାହା ବିଫଳ ହୋଇଥିଲା। ତେବେ ବୁଧବାର ପରିଷଦର ବରିଷ୍ଠ ପଦାଧିକାରୀଙ୍କୁ ନେଇ ବସିଥିବା ବୈଠକରେ ଆସନ୍ତା ୮ରୁ ମୂଲ୍ୟାୟନ ଆରମ୍ଭ କରାଯିବ ବୋଲି ନିଷ୍ପତ୍ତି କରାଯାଇଛି। ସୂଚନା ମୁତାବକ ଚଳିତ ବର୍ଷ ଦୁଇଟି ପର୍ଯ୍ୟାୟରେ ମୂଲ୍ୟାୟନ କରାଯିବ। ସମସ୍ତ କେନ୍ଦ୍ରଗୁଡ଼ିକୁ ଦୁଇରୁ ତିନି ଦିନ ମଧ୍ୟରେ ଚିଠି କରି ଅବଗତ କରାଯିବ। ପ୍ରଥମେ ପରୀକ୍ଷା ହୋଇଥିବା ବିଷୟଗୁଡ଼ିକ ପ୍ରଥମେ ମୂଲ୍ୟାୟନ କରାଯିବ। ଦ୍ବିତୀୟ ପର୍ଯ୍ୟାୟରେ ଅନ୍ୟ ବିଷୟଗୁଡ଼ିକ ମୂଲ୍ୟାୟନ କରିବାକୁ ପରିଷଦ ପକ୍ଷରୁ ନିଷ୍ପତ୍ତି ହୋଇଛି। ଉଭୟ ଅନ୍ଲାଇନ୍ ଓ ଅଫ୍ଲାଇନ୍ରେ ପରୀକ୍ଷା ଖାତା ମୂଲ୍ୟାୟନ କରାଯିବ। ବିଜ୍ଞାନ ଓ ବାଣିଜ୍ୟ ପାଠ୍ୟକ୍ରମର ସମସ୍ତ ବିଷୟ ଅନ୍ଲାଇନ୍ରେ ଏବଂ କଳା, ଧନ୍ଦାମୂଳକ ପାଠ୍ୟକ୍ରମର ସମସ୍ତ ବିଷୟ ଅଫ୍ଲାଇନ୍ରେ ମୂଲ୍ୟାୟନ କରାଯିବ। କଳା, ବାଣିଜ୍ୟ ଓ ବିଜ୍ଞାନର ସମାନ ପାଠ୍ୟକ୍ରମ ଥିବା ଅଲ୍ଟରନେଟିଭ ଏମ୍.ଆଇ.ଏଲ୍ ଓ ଗଣିତ, ଆଇଟି, ପରିସଂଖ୍ୟାନ ଭଳି ବିଷୟଗୁଡ଼ିକ ମଧ୍ୟ ଅନ୍ଲାଇନ୍ରେ ମୂଲ୍ୟାୟନ କରାଯିବ। ମୋଟ ୫୮ଟି କେନ୍ଦ୍ରରେ ଅଫ୍ଲାଇନ୍ରେ ମୂଲ୍ୟାୟନ ଓ ୩୬ଟି କେନ୍ଦ୍ରରେ ଅନ୍ଲାଇନ୍ରେ ମୂଲ୍ୟାୟନ କରିବାକୁ ଆପତତଃ ସ୍ଥିର କରାଯାଇଛି।
କଳା ଓ ଧନ୍ଦାମୂଳକ ପାଠ୍ୟକ୍ରମର ମୂଲ୍ୟାୟନ କାର୍ଯ୍ୟରେ ମୋଟ ୧୨ ହଜାର ଅଧ୍ୟାପକ/ଅଧ୍ୟାପିକା ନିେୟାଜିତ ହେବେ। ସେହିପରି ୩ ହଜାର ୫ଶହ ଅଧ୍ୟାପକ ବିଜ୍ଞାନ ଓ ୧୦୦୦ ଅଧ୍ୟାପକ ବାଣିଜ୍ୟ ପାଠ୍ୟକ୍ରମର ମୂଲ୍ୟାୟନ କାମରେ ସାମିଲ ହେବେ।
ଏପ୍ରିଲ ଶେଷ ସୁଦ୍ଧା ମୂଲ୍ୟାୟନ ଶେଷ କରି ମେ ତୃତୀୟ ସପ୍ତାହରେ ବିଜ୍ଞାନ ଓ ଜୁନ୍ ପ୍ରଥମ ସପ୍ତାହ ସୁଦ୍ଧା କଳା,ବାଣିଜ୍ୟ ପରୀକ୍ଷା ଫଳ ପ୍ରକାଶନ କରିବାକୁ ପରିଷଦ ପକ୍ଷରୁ ଲକ୍ଷ୍ୟ ରଖାଯାଇଛି।
Comments are closed.