ମୁମ୍ବଇ : ଅଜୟ ଦେବଗନଙ୍କ ୫୦ତମ ଜନ୍ମଦିନ ଅବସରରେ ମଙ୍ଗଳବାର ତାଙ୍କ ଆଗାମୀ ଚଳଚ୍ଚିତ୍ର ‘ଦେ ଦେ ପ୍ୟାର ଦେ’ ର ଟ୍ରେଲର ରିଲିଜ୍ ହୋଇଛି। ଏହା ଏକ ଫ୍ୟାମିଲି କମେଡ଼ି ଡ୍ରାମା ଭିତ୍ତିକ ଚଳଚ୍ଚିତ୍ର। ଏଥିରେ ଅଜୟ ଏମିତି ଜଣେ ସ୍ବାମୀଙ୍କ ଭୂମିକାରେ ଅବତୀର୍ଣ୍ଣ ଯିଏ ନିଜ ପିଲାଙ୍କ ବୟସର ଜଣେ ଝିଅ ସହ ପ୍ରେମରେ ପଡ଼ିଯାଇଛନ୍ତି। ଚଳଚ୍ଚିତ୍ରରେ ଅଜୟଙ୍କ ବ୍ୟତୀତ ତବୁ ଓ ରକୁଲପ୍ରୀତ୍ ସିଂହ ଗୁରୁତ୍ବପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି।
ଏହି ଚଳଚ୍ଚିତ୍ରରେ ଅଜୟଙ୍କ ପ୍ରଥମ ପତ୍ନୀ ଭୂମିକାରେ ତବୁ ଅଭିନୟ କରିଥିବା ବେଳେ କମ୍ ବୟସର ପ୍ରେମିକା ସାଜିଛନ୍ତି ରକୁଲପ୍ରୀତ୍। କମ୍ ବୟସର ପ୍ରେମିକାକୁ ନେଇ ଅଜୟ କିପରି ନିଜ ପିଲା, ମାଆ-ବାପା ଓ ବନ୍ଧୁଙ୍କ ସାମ୍ନା କରୁଛନ୍ତି ତାହା ୩ ମିନଟ୍ ୧୭ ସେକେଣ୍ଡର ଏହି ଟ୍ରେଲରରେ ଦେଖିବାକୁ ମିଳିଛି। ଏଥିସହିତ ତାଙ୍କ ପତ୍ନୀ କିପରି ପ୍ରେମରେ ବାଧକ ସାଜୁଛନ୍ତି ତାହା ମଧ୍ୟ ଦେଖିବାକୁ ମିଳିଛି।
‘ମି ଠୁ’ ଅଭିଯୋଗରେ ଫଶିଥିବା ଆଲୋକନାଥ ଏଥିରେ ଅଜୟଙ୍କ ପିତା ଭୂମିକାରେ ଅଭିନୟ କରିଛନ୍ତି। ଏଥିସହିତ ଜାବେଦ ଜାଫରୀ ଓ ଜିମ୍ମୀ ଶେରଗିଲଙ୍କୁ ମଧ୍ୟ ଏହି ଚଳଚ୍ଚିତ୍ରରେ ଦେଖିବାକୁ ମିଳିବ। ଟି-ସିରିଜ୍ ଓ ଲଭ୍ ଫିଲ୍ମସର ମିଳିତ ପ୍ରଯୋଜନାରେ ଏହି ଚଳଚ୍ଚିତ୍ର ନିର୍ମାଣ କରାଯାଇଥିବା ବେଳେ ଏହାର ନିର୍ଦେଶନା ଭାର ଅକିଭ୍ ଅଲ୍ଲୀ ବହନ କରିଛନ୍ତି। ଏହା ଚଳିତ ବର୍ଷ ମେ ୧୭ରେ ମୁକ୍ତିଲାଭ କରିବ।
.
