ଗୋପ : ପିପିଲି-କୋଣାର୍କ ରାସ୍ତାର ବେଗୁନିଆ ଛକଠାରେ ରବିବାର ଏକ କାର ଧକ୍କାରେ ଜଣେ ସାଇକେଲ ଆରୋହୀଙ୍କ ମୃତ୍ୟୁ ଘଟିଥିବାବେଳେ ୪ ଜଣ ଆହତ ହୋଇଛନ୍ତି ।
ସୂଚନା ଅନୁସାରେ ଗୋପ ଥାନା ଏରବଙ୍ଗ ପଞ୍ଚାୟତ ସ୍ଥିତ ପାଟଳିଆ ଗ୍ରାମର ରବି ଭୋଇ(୫୮) ସକାଳେ ବେଗୁନିଆ ଛକ ଆସୁଥିବା ବେଳେ କୋଣାର୍କକୁ ଯାଉଥିବା ଏକ ପର୍ଯ୍ୟଟକ କାର ଭାରସାମ୍ୟ ହରାଇ ତାଙ୍କୁ ସମ୍ମୁଖରୁ ଧକ୍କା ଦେଇ ଏକ ନଡ଼ିଆ ଗଛରେ ପିଟି ହୋଇଯାଇଥିଲା। ଏଥିରେ ରବିଙ୍କ ମୃତ୍ୟୁ ଘଟିଥିବାବେଳେ କାରରେ ଥିବା ୪ ପର୍ଯ୍ୟଟକ ଆହତ ହୋଇଛନ୍ତି। ଘଟଣାକୁ ନେଇ ଉତ୍ତ୍ୟକ୍ତ ଲୋକେ ପିପିଲି-କୋଣାର୍କ ରାସ୍ତାକୁ ଅବରୋଧ କରିଥିଲେ। ଗୋପ ପୁଲିସ, ରାଜସ୍ୱ ବିଭାଗ କର୍ମଚାରୀ, ସ୍ଥାନୀୟ ସରପଞ୍ଚ ରାସ୍ତାରୋକସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିବା ସହ ରେଡ଼କର୍ସ ପାଣ୍ଠିରୁ ୧୦ ହଜାର ଟଙ୍କା ପ୍ରଦାନ କରିବାକୁ ପ୍ରତିଶ୍ରୁତି ଦେବାପରେ ରାସ୍ତାରୋକ ହଟିଥିଲା।
