ନୂଆଦିଲ୍ଲୀ : ଭାରତ ଓ ତିବତ୍ ସୀମାନ୍ତ ଡୋଗରୀ ନାଳ ହିମଖଣ୍ଡରେ ଦବି ରହିଥିବା ଦୁଇ ଜଣ ଯବାନଙ୍କ ମୃତଦେହ ୨୨ ଦିନ ପରେ ଉଦ୍ଧାର ହୋଇଛି । ସହିଦ ଯବାନଙ୍କ ପରିଚୟ ମିଳିଛି । ହିମାଚଳ ପ୍ରଦେଶର ନିରମଣ୍ଡର ବିଦେଶ କୁମାର ଏବଂ ଜମ୍ମୁର ଅର୍ଜୁନଙ୍କ ମୃତଦେହ ଉଦ୍ଧାର ହୋଇଛି ।
ଗତ ଜାନୁଆରୀ ୨୦ ତାରିଖରେ ଡୋଗରୀ ନାମକ ସ୍ଥାନରେ ସେନାର ୬ ଜଣ ଯବାନ ପାଟ୍ରୋଲିଙ୍ଗ କରୁଥିବା ସମୟରେ ହିମସ୍ରୋତ ମାଡି ଆସିଥିଲା । ଏଥିରେ ଯବାନମାନେ ଫସି ଯାଇଥିଲେ । ଦୁର୍ଘଟଣା ପରେ ୪ ଜଣ ଯବାନଙ୍କ ମୃତଦେହ ଜବତ ହୋଇଥିବା ବେଳେ ୨ ଜଣ ନିଖୋଜ ଥିଲେ । ସେମାନଙ୍କୁ ଖୋଜିବା ପାଇଁ ସର୍ଚ୍ଚ ଅପରେସନ ଜାରି ରହିଥିଲା । ଗୁରୁବାର ସକାଳେ ସର୍ଚ୍ଚ ଅପରେସନ ବେଳେ ଦୁଇ ଜଣ ଯବାନଙ୍କ ମୃତଦେହ ଉଦ୍ଧାର ହୋଇଛି । ଏହା ସହ ୨୩ ଦିନ ଧରି ଚାଲିଥିବା ତଲାସୀ ଅଭିଯାନ ଶେଷ ହୋଇଛି ।
