ଭୁବନେଶ୍ବର : ଅଭିଜ୍ଞ ସାଂସଦ ତଥାଗତ ସତପଥୀ ରାଜନୀତିରୁ ସନ୍ନ୍ୟାସ ନେଇଛନ୍ତି । ସେ ନିର୍ବାଚନ ଲଢିବେ ନାହିଁ ବୋଲି ସ୍ପଷ୍ଟ କରିଛନ୍ତି । ଏକ ବୈଦ୍ୟୁତିକ ଗଣମାଧ୍ୟମରେ ପ୍ରତିକ୍ରିୟା ଦେଇ ତଥାଗତ ସତପଥୀ କହିଛନ୍ତି ଯେ, ଟିକେଟ୍ କାଟିବାକୁ କାହାର ଦମ୍ ନାହିଁ । ପୁଅ ଓ ସାମ୍ବାଦିକତା ପାଇଁ ରାଜନୀତି ଛାଡୁଛି । କାହା ଚାପରେ ରାଜନୀତି ଛାଡିବାର ନିଷ୍ପତ୍ତି ନେଇଛନ୍ତି କି ପ୍ରଶ୍ନର ଉତ୍ତର ଦେଇ ତଥାଗତ ସତପଥୀ କହିଛନ୍ତି ଯେ, ମୋର ଗୋଟିଏ ଚାପ ହେଉଛି ପୁଅର ଚାପ । ପୁଅ କହିଲା ନିର୍ବାଚନ ଲଢନାହିଁ, ସାମ୍ବାଦିକତା କର ଓ ଘରେ ରୁହ । ଓଡିଶାରେ ନିରପେକ୍ଷ ଓ ନିର୍ଭୀକ ସାମ୍ବାଦିକଙ୍କର ଅଭାବ ରହିଛି । ସମସ୍ତେ ମୁଣ୍ଡ ବିକି ଦେଇଛନ୍ତି । ମୁଁ ନିରପେକ୍ଷ ଓ ନିର୍ଭୀକ ଖବର ପରିବେଷଣ କରିବାକୁ ଚେଷ୍ଟା କରିବି । ୩ ମାସ ହେବ ମୁଁ ଏହି କଥା କହୁଛି । ମନ ଦୁଃଖ ନାହିଁ ବରଂ ମୁଁ ଖୁସି ମନରେ କହୁଛି ଯେ ମୁଁ ରାଜନୀତି ଛାଡୁଛି । ମୁଁ କୌଣସି ଦଳରେ ମିଶିବି ନାହିଁ । ନବୀନଙ୍କ ପ୍ରତି ମୋର ଯଥେଷ୍ଟ ସମ୍ମାନ ରହିଛି । ନିର୍ବାଚନ ସରିବାର ୩/୪ ମାସ ପରେ ଢେଙ୍କାନାଳ ବୁଲିବି ।
ସୂଚନାଯୋଗ୍ୟ, ବିଜେଡିର ବରିଷ୍ଠ ତଥା ଅଭିଜ୍ଞ ସାଂସଦ ତଥାଗତ ସତପଥୀ ରାଜନୀତି ଛାଡୁଛନ୍ତି ବୋଲି ତାଙ୍କ ନିର୍ବାଚନମଣ୍ଡଳୀରେ ଚର୍ଚ୍ଚା ଜୋର ଧରିଥିଲା । ଆସନ୍ତା ୬ ତାରିଖ ପର୍ଯ୍ୟନ୍ତ ଅପେକ୍ଷା କରନ୍ତୁ, ମୁଖ୍ୟମନ୍ତ୍ରୀଙ୍କୁ ସାକ୍ଷାତ୍ କରି ଆଲୋଚନା କରିବା ପରେ ଚୂଡ଼ାନ୍ତ ନିଷ୍ପତ୍ତି ନେବି ବୋଲି ତଥାଗତ ସତପଥୀ ଆମ ଭୁବନେଶ୍ବର ପ୍ରତିନିଧିଙ୍କୁ କହିଥିଲେ । ଓଡ଼ିଶାର ଏକମାତ୍ର ମହିଳା ମୁଖ୍ୟମନ୍ତ୍ରୀ ନନ୍ଦିନୀ ଶତପଥୀଙ୍କ ସାନ ପୁଅ ତଥାଗତ ସତପଥୀ ଢେଙ୍କାନାଳ ଲୋକସଭା ନିର୍ବାଚନମଣ୍ଡଳୀ ଆସନରୁ ୧୨ଶ, ୧୪ଶ, ୧୫ଶ ଏବଂ ୧୬ଶ ଲୋକସଭାକୁ ନିର୍ବାଚିତ ହୋଇଥିଲେ ।
