ଗଜପତି: ବଙ୍ଗୋପସାଗରେ ଗଭୀର ଅବପାତ କେନ୍ଦ୍ରୀଭୂତ ହୋଇ ସମୁଦ୍ର ଭିତରେ ବଳ ଗୋଟାଇବା ସହ ଘନୀଭୁତ ହୋଇ ଆଜି ବାତ୍ୟା ରୂପ ନେଇଛି । ବାତ୍ୟା ମନ୍ଥା ମଙ୍ଗଳବାର ଦିନ ଆନ୍ଧ୍ରପ୍ରଦେଶର ମଛିଲପଟନମ୍ ଓ କଳିଙ୍ଗପଟନମ୍ ମଝି କାକିନଡା ନିକଟବର୍ତ୍ତୀ କୌଣସିଠାରେ ସ୍ଥଳ ଭାଗ ଛୁଇଁବ । ଆନ୍ଧ୍ରରେ ଏହା ସ୍ଥଳଭାଗ ଛୁଇଁଲେ ମଧ୍ୟ ଓଡ଼ିଶାର ୮ଟି ଜିଲାରେ ପ୍ରବଳ ବର୍ଷା ହେବ ବୋଲି ଭାରତୀୟ ପାଣିପାଗ ବିଭାଗ ଆକଳନ କରିଛି ।
ଆଜି ବାତ୍ୟାର ପ୍ରଭାବ ସକାଳୁ ସକାଳୁ ଗଜପତି ଜିଲାରେ ଦେଖିବାକୁ ମିଳିଛି । ଗଜପତି ଜିଲ୍ଲା ମହେନ୍ଦ୍ରଗିରି ଅଞ୍ଚଳରେ ମନ୍ଥାର ପ୍ରଭାବ ଆରମ୍ଭ ହୋଇଯାଇଛି। ଜିଲାରେ ଆକାଶ ମେଘୁଆ ରହିବା ସହ ବର୍ଷା ହେବା ଆରମ୍ଭ କରିବା ସହ ଓ ପବନ ବହିବା ଆରମ୍ଭ କରିଛି ।
ଜିଲାର ଅନେକ ଗ୍ରାମରେ ପ୍ରବଳ ବର୍ଷା ପବନ ବହିବା ଆରମ୍ଭ ହୋଇଛି । ମହେନ୍ଦ୍ରଗିରିକୁ ପ୍ରଶାସନ ବନ୍ଦ କରିବା ସତ୍ତ୍ୱେ ବହୁ ସଂଖ୍ୟାରେ ଭକ୍ତ, ଶ୍ରଦ୍ଧାଳୁ, ପର୍ୟ୍ୟଟକ ଆଜି ଭିଡ ଜମାଇଛନ୍ତି। ଭିଡ ରୋକିବା ଓ ଲୋକଙ୍କୁ ବାରଣ କରିବାକୁ ପୁଲିସ ପହଞ୍ଚି ନାହିଁ । ସେପଟେ ଜିଲ୍ଲା ପ୍ରଶାସନ ନିୟୋଜିତ କରିଥିବା କିଛି ଅଧିକାରୀ ମହେନ୍ଦ୍ରଗିରି ଅଞ୍ଚଳରେ ପହଞ୍ଚି ନଥିବା ଅଭିଯୋଗ ହୋଇଛି। ଶତାଧିକ ଲୋକଙ୍କୁ ସ୍ଥାନାନ୍ତର କରି ସୁରକ୍ଷିତ ଠିକଣାରେ ରଖିଛି ପ୍ରଶାସନ। ଆଜି ସନ୍ଧ୍ୟା ସୁଦ୍ଧା ଦୁଇଟି ଏନଡିଆରଏଫ୍ ତିନୋଟି ଓଡ଼୍ରାଫ୍ ଦଳ ପାରଳାଖେମୁଣ୍ଡିରେ ପହଞ୍ଚିବେ ।
