ଆଠଗଡ:ଆଠଗଡ ବୁଦ୍ଧିଜୀବୀ ବରିଷ୍ଠ ନାଗରିକ ସଂଘ ଆନୁକୂଲ୍ୟରେ ଆନ୍ତର୍ଜାତିକ ବରିଷ୍ଠ ନାଗରିକ ଦିବସ ପାଳିତ ହୋଇଯାଇଛି। ସଙ୍ଘର ସଭାପତି ଇଂ ଶିବ ପ୍ରସାଦ ପଣ୍ଡା ଏଥିରେ ପୌରୋହିତ୍ୟ କରି ବରିଷ୍ଠ ନାଗରିକମାନେ ଉତ୍ତରପିଢି ପାଇଁ ଦିଗଦର୍ଶକ ଓ ପଥପ୍ରଦର୍ଶକ ଏବଂ ସେମାନେ ସମାଜ ପାଇଁ ସମ୍ପଦ ବୋଲି ମତପ୍ରକାଶ କରିଥିଲେ। ସେଥିପାଇଁ ଆନ୍ତର୍ଜାତିକ ସ୍ତରରେ ୧୯୯୧ ମସିହାରୁ ଅକ୍ଟୋବର ୧ ତାରିଖକୁ ବରିଷ୍ଠ ନାଗରିକମାନଙ୍କ ଉଦେଶ୍ୟରେ ଉତ୍ସର୍ଗୀକୃତ କରାଯାଇଛି ବୋଲି ଶ୍ରୀ ପଣ୍ଡା ପ୍ରକାଶ କରିଥିଲେ। ସଙ୍ଘର ସଭ୍ୟ ଶ୍ରୁତିଧର ପ୍ରଧାନ ନିଜର ବକ୍ତବ୍ୟରେ ବର୍ତ୍ତମାନ ବରିଷ୍ଠ ନାଗରିକ ମାନଙ୍କୁ ବହୁ ସଂସ୍ଥା ଓ ସରକାରୀ ସ୍ତରରେ ବିଭିନ୍ନ ସୁବିଧା ସୁଯୋଗ ଯୋଗାଇ ଦିଆଯାଉଛି ଏବଂ ସେ ନିଜେ ଏହାର ସୁଫଳ ପାଇଥିବା ସୂଚନା ଦେଇଥିଲେ। ସଙ୍ଘର ବରିଷ୍ଠ ସଭ୍ୟା ପୁଲିନ ମିଶ୍ର ବରିଷ୍ଠ ନାଗରିକମାନଙ୍କର ବିବିଧ ସମସ୍ୟା ସମ୍ପର୍କରେ ନିଜର ମତ ରଖିଥିଲେ। ଏଥିସହ ବିଭିନ୍ନ ଜରାଶ୍ରମରେ ବରିଷ୍ଠ ନାଗରିକମାନେ କିପରି ରହୁଛନ୍ତି ଓ ସେଠାରେ ସେମାନଙ୍କ ଦୈନନ୍ଦିନ ଚଳଣି ଉପରେ ସମ୍ୟକ ସୂଚନା ଦେବା ସହ ସେଠାକୁ ଯାଇ ସଙ୍ଘର ସାଧ୍ୟ ମତେ ସାହାଯ୍ୟ କରିବା ପାଇଁ ପରାମର୍ଶ ଦେଇଥିଲେ। ସଙ୍ଘର ସାଧାରଣ ସମ୍ପାଦକ ଗିରୀଶ କୁମାର ମିଶ୍ର ଉକ୍ତ କାର୍ଯ୍ୟକ୍ରମକୁ ପରିଚାଳନା କରିବା ସହିତ ଶେଷରେ ଧନ୍ୟବାଦ ଅର୍ପଣ କରିଥିଲେ।
Popular Categories
Previous article
Next article