ଲକ୍ଷ୍ମୀପୁର: କୋରାପୁଟ ଜିଲ୍ଲା ଲକ୍ଷ୍ମୀପୁର ବ୍ଲକ ସଦର ମହକୁମା ବଜାରରେ ଦୀର୍ଘ ୨୦ ବର୍ଷରୁ ଊର୍ଦ୍ଧ୍ବ ସମୟ ହେଲା ଜଣେ ମାନସିକ ଅନଗ୍ରସର ମହିଳା ଅସହାୟ ଅବସ୍ଥାରେ ମାଗିଯାଚି ଖାଉଥିଲେ। ବର୍ତମାନ ସେ ବାର୍ଦ୍ଧକ୍ୟର ଅପରାହ୍ନରେ ପହଞ୍ଚିଥିବାବେଳେ ଏବେ ସେ ଆଉ ଚଲାବୁଲା କରିପାରୁନାହାନ୍ତି। ବୃଦ୍ଧାବସ୍ଥା ସହିତ ଏକ ରୋଗଜନିତ କାରଣରୁ ଠିକ୍ ଭାବେ ଗାଧୁଆ ପାଧୁଆ ନକରିବା କାରଣରୁ ଦୁର୍ଗନ୍ଧ ଯୋଗୁଁ ଲୋକମାନେ ତାଙ୍କ ପାଖ ମାଡୁନଥିଲେ। ସେହିପରି ବାହାରେ ଲୋକଙ୍କ ଦୋକାନ ଦୂଆରେ ଶୋଇ ଜୀବନ ବିତାଉଥିଲେ। ଏନେଇ ଗତ ଅଗଷ୍ଟ ୨୨ ତାରିଖରେ “ସମାଜ”ରେ ଖବର ପ୍ରକାଶ ପାଇଥିଲା। ଯାହାକୁ ଜଣେ ସ୍ବେଚ୍ଛାସେବୀ ବିଶ୍ବରଞ୍ଜନ ନାୟକ ମୁଖ୍ୟମନ୍ତ୍ରୀଙ୍କୁ ଟ୍ବିଟ୍ କରି ଅଭିଯୋଗ ଶୁଣାଣି ମାଧ୍ୟମରେ ଜଣାଇ ଥିଲେ। ଏବଂ ସେ ଅନ୍ୟ କିଛି ବିଭାଗୀୟ ମୁଖ୍ୟ ଓ ଅଧିକାରୀ ଙ୍କୁ ମଧ୍ୟ ଟ୍ବିଟ୍ ମାଧ୍ୟମରେ ଜଣାଇଥିଲେ।
ଯାହାକୁ ନେଇ ସମ୍ପୃକ୍ତ ବୃଦ୍ଧା ଙ୍କୁ ଆଶ୍ରୟ ଗୃହରେ ନେଇ ରଖାଯିବା ପାଇଁ ବ୍ୟବସ୍ଥା କରାଯାଇଥିଲା। ତେବେ ତାଙ୍କ ବଦଳରେ ଅନ୍ୟ ଜଣଙ୍କୁ ନିଆଯାଇ ରିପୋର୍ଟ ପ୍ରଦାନ କରାଯାଇଥିଲା। ଏନେଇ ସେପ୍ଟେମ୍ବର ୨୮ ତାରିଖ ଦିନ ପୁଣି ଖବର ପ୍ରକାଶିତ ହେବା ପରେ ସମ୍ପୃକ୍ତ ସ୍ବେଚ୍ଛାସେବୀ ଜଣଙ୍କ ପୁଣି ଟ୍ବିଟ୍ କରି ଜଣାଇବା ପରେ ମାନସିକ ଅନଗ୍ରସର ବୃଦ୍ଧା ଙ୍କୁ ଲକ୍ଷ୍ମୀପୁରରୁ ଉଦ୍ଧାର କରି ଉକ୍ତ ସଂସ୍ଥା ନେଇଥିବା ଜଣାପଡିଛି। ତେବେ “ସମାଜର ପ୍ରୟାସ ଯୋଗୁଁ ଜଣେ ମାନସିକ ଅନଗ୍ରସର ନିରାଶ୍ରୟ ମହିଳା ଙ୍କୁ ଆଶ୍ରୟ ଗୃହ ମିଳିଲା ବୋଲି ସାଧାରଣରେ କୁହାଯାଉଛି।
