ଭୁବନେଶ୍ବର, ୨୭ା୯: ଟିଭିଏସ୍ ଭାରତୀୟ ବଜାରରେ ନିଜ ଲୋକପ୍ରିୟ ମୋପେଡ୍ ଏକ୍ସଏଲ୍ ୧୦୦ର ନୂଆ ଭାରିଆଣ୍ଟ ଲଞ୍ଚ୍ କରିଦେଇଛି। କମ୍ପାନୀ ଏହାକୁ ଏକ୍ସଏଲ୍ ୧୦୦ ହେଭି ଡ୍ୟୁଟି ଆଲୟ ନାଁ ଦେଇଛି। ଏଥିରେ ଆଲୟହ୍ବିଲ୍ ସହିତ ଟ୍ୟୁବଲେସ୍ ଟାୟାର ଓ ଏଲଇଡି ହେଡଲାଇଟ୍ ଦିଆଯାଇଛି। ଏହାର ଏକ୍ସ ଶୋରୁମ୍ ଦାମ୍ ୫୯,୮୦୦ ଟଙ୍କା ରଖିଛି କମ୍ପାନୀ। ଏହା ସହିତ ଏକ୍ସଏଲ୍ ୧୦୦ର ଲାଇନଅପ ଏବେ ସମୁଦାୟ ୫ ଭାରିଆଣ୍ଟ ପର୍ଯ୍ୟନ୍ତ ପହଞ୍ଚିଛି।
ଏଥିରେ ୯୯.୭ ସିସି ଏୟାର କୁଲ୍ଡ ସିଙ୍ଗଲ ସିଲିଣ୍ଡର ଇଞ୍ଜିନ ଦିଆଯାଇଛି ଯାହା ୪.୩ ବିଏଚପିର ପାଓ୍ବର ଓ ୬.୫ ଏନଏମର ଟର୍କ ଉତ୍ପନ କରିବ। ଉଭୟ ଫ୍ରଣ୍ଟ୍ ଏବଂ ରିୟରରେ ଡ୍ରମ୍ ବ୍ରେକ୍ ମିଳିବ। ପୂର୍ବରୁ ଏଥିରେ ସ୍ପୋକ୍ ହ୍ବିଲ୍ସ ମିଳୁଥିଲା। କିନ୍ତୁ ଏବେ ଆଲୟ ହ୍ବିଲ୍ ସହିତ ଏହାର ଲୁକ୍ ଅଧିକ ଆକର୍ଷକ ଲାଗୁଛି। ଟ୍ୟୁବଲେସ୍ ଟାୟାର ଯୋଗୁଁ ଏହାର ପଙ୍କଚର ସମସ୍ୟା ଏଣିକି ଦୂର ହେବ। ଏତେ ପରିବର୍ତ୍ତନ ସତ୍ତ୍ବେ ଏହାର ଓଜନ ୮୯ କିଲୋଗ୍ରାମ ରଖାଯାଇଥିବା କମ୍ପାନୀ ସୂଚନା ଦେଇଛି। ଗ୍ରାହକ ଏହାର ନୂଆ ଭାରିଆଣ୍ଟକୁ ଲାଲ୍, ବ୍ଲୁ ଏବଂ ଗ୍ରେ ରଙ୍ଗର ବିକଳ୍ପ ସହିତ କ୍ରୟ କରିପାରିବେ।
