ବୌଦ୍ଧ : ଦକ୍ଷିଣ ଓଡିଶା ପରେ ଏବେ ପୁଣି ଥରେ ପଶ୍ଚିମ ଓଡିଶାରେ ତେଜିଲା ସାର ସଙ୍କଟ। ସାରା ରାତି ଉଜାଗର ରହି ସାର ପାଇଁ ଜଗିଛନ୍ତି ତଥାପି ସାର ମିଳୁନି। ଫଳରେ ଉତ୍ତ୍ୟକ୍ତ ଚାଷୀମାନେ ରାସ୍ତାରୋକ କରିଛନ୍ତି। ବୌଦ୍ଧ ଜିଲ୍ଲା ଖୁଣ୍ଟବନ୍ଧ ସେବା ସମବାୟ ସମିତିରେ ଏମିତି କିଛି ଦୃଶ୍ୟ ଦେଖିବାକୁ ମିଳିଛି। କଳାବଜାରୀ ଉପରେ ରୋକ୍ ଲଗାଇବା ସହ ବେଆଇନ ମହଜୁଦକାରୀଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ କିଛି ଦିନ ତଳେ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ । ଏହାପରେ ରାଜ୍ୟବ୍ୟାପୀ ଧରପଗଡ଼ ଚାଲିଥିଲେ ବି ସାର ସଙ୍କଟ ଶେଷ ହେଉନାହିଁ ।
ଗତ ୧୩ ତାରିଖରେ ସାର ସଙ୍କଟକୁ ନେଇ ଚାଷୀମାନେ ସମବାୟ ସମିତି ସମ୍ମୁଖରେ ରାସ୍ତା ଅବରୋଧ କରିଥିଲେ। ତଥାପି ସାର ସମସ୍ୟାର ସମାଧାନ ହେଉନି। ବୁଧବାର ସକାଳ ୫ଟାରୁ ଚାଷୀମାନେ ସମବାୟ ସମିତି ସାମ୍ନାରେ ଲମ୍ବା ଲାଇନ୍ ଲଗାଇବା ପରେ ବି ସାର ମିଳିନଥିବା ଅଭିଯୋଗ ହୋଇଛି। ଏ ନେଇ ଖୋର୍ଦ୍ଧା-ବଲାଙ୍ଗୀର ଜାତୀୟ ରାଜପଥରେ ଗାଡି ଚଳାଚଳ ପ୍ରଭାବିତ ହୋଇଛି। ରାସ୍ତାର ଉଭୟ ପାର୍ଶ୍ବରେ ଶହ ଶହ ଗାଡିମୋଟର ଅଟକି ରହିଛି। ତା ମଧ୍ୟରେ ଆମ୍ବୁଲାନ୍ସ ମଧ୍ୟ ଫସି ରହିଥିବା ଦେଖିବାକୁ ମିଳିଛି।
