ହଂକଂ, : ଦକ୍ଷିଣ ଚୀନ ସାଗରରେ ସୃଷ୍ଟ ମହାବାତ୍ୟା ‘ରାଗାସା’ ଉଗ୍ରରୂପ ଧରି ଆଗକୁ ବଢିବାରେ ଲାଗିଛି। ଚଳିତ ବର୍ଷର ଏହାକୁ ସବୁଠାରୁ ଶକ୍ତିଶାଳୀ ଝଡ଼ କୁହାଯାଉଛି। ‘ରାଗାସା’ ଫିଲିପାଇନ୍ସ ସମେତ ଅନେକ ପଡୋଶୀ ଦେଶକୁ ଦୋହଲାଇ ଦେଇଛି। ଭୟାବହତାକୁ ନଜରରେ ରଖି ହଂକଂ ଅନ୍ତର୍ଜାତୀୟ ବିମାନବନ୍ଦରକୁ ୨୩ରୁ ୨୫ ସେପ୍ଟେମ୍ବର ପର୍ଯ୍ୟନ୍ତ ବନ୍ଦ କରାଯାଇଛି। ମହାବାତ୍ୟା ଏବେ ଚୀନ ମୁହାଁ ହୋଇଛି। ଫିଲିପାଇନ୍ସରେ ଏହାର ଗତି ଘଣ୍ଟା ପ୍ରତି ୨୯୫ କିମି ରହିଛି। ଦକ୍ଷିଣ ଚୀନ ସାଗରରେ ଅନେକ ଦ୍ବୀପରୁ ବିମାନ ଚଳାଚଳକୁ ବାତିଲ କରାଯାଇଛି। ମକାଉ ଓ ହଂକଂ ସମେତ ଅନେକ ଅଞ୍ଚଳରେ ସ୍କୁଲ-କଲେଜ ବନ୍ଦ କରିଦିଆଯାଇଛି।
ଚୀନର ଦକ୍ଷିଣ-ପୂର୍ବ ଉପକୂଳ ଫୁଜିୟାନ ଓ ଗୁଆଁଗଦୋଙ୍ଗରେ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି। ଶେନଜେନ୍ ସହରରୁ ପ୍ରାୟ ୪ ଲକ୍ଷ ଲୋକଙ୍କୁ ସୁରକ୍ଷିତ ସ୍ଥାନକୁ ପଠାଯାଇଛି। ଚୀନର ଦକ୍ଷିଣ ଭାଗ ୧୦ ସହରରେ ସମସ୍ତ ଦୋକାନ ବଜାର ସହ ଶିକ୍ଷାନୁଷ୍ଠାନକୁ ବନ୍ଦ କରିବାକୁ ଆଦେଶ ଦିଆଯାଇଛି।
ରାଗାସା ଫିଲିପାଇନ୍ସରେ ଅନେକ କ୍ଷତି ଘଟାଇଛି। ଅନେକ ଗଛ ଭାଙ୍ଗିପଡିବା ସହ ଘର ମାଟିରେ ମିଶିଯାଇଛି। ଉତ୍ତର ଫିଲିପାଇନ୍ସରେ ଭୂସ୍ଖଳନ ଯୋଗୁଁ ୨ ଜଣ ପ୍ରାଣ ହରାଇଥିବାବେଳେ ଅନେକ ଆହତ ହୋଇଛନ୍ତି। ହଂକଂରେ ଜାରି ସତର୍କସୂଚନାରେ ରାଗାସାରେ ପ୍ରବଳ ବେଗରେ ପବନ ବହିବା ସହ ସମୁଦ୍ରରେ ୪ ମିଟର ଉଚ୍ଚ ଲହଡ଼ି ଉଠିବ ବୋଲି କୁହାଯାଇଛି। ଏହା ସହ ୩୦୦ କିମି ବେଗରେ ପବନ ବହିବା ଅନୁମାନ କରାଯାଉଛି।
ଫିଲିପାଇନ୍ସ ଶବ୍ଦ ‘ରାଗାସା’ର ଅର୍ଥ ତୀବ୍ର ଗତି। ଏହି ଝଡ଼ ଚଳିତ ବର୍ଷ ଫିଲିପାଇନ୍ସରେ ଆସିଥିବା ୧୪ତମ ବଡ ଝଡ଼। ବୁଧବାର ସକାଳେ ଏହା ହଂକଂ ଛୁଇଁବ। ଚୀନର ଦକ୍ଷିଣ ଭାଗ ସହ ତାଇୱରନରେ ଏହା ତାଣ୍ଡବ ରଚିବା ଆଶଙ୍କା କରାଯାଉଛି।
