ଭୁବନେଶ୍ୱର : ମହିଳା କନଷ୍ଟେବଳ ଶୁଭମିତ୍ରା ସାହୁ ହତ୍ୟା ଘଟଣାରେ ଅଭିଯୁକ୍ତ ଦୀପକ ରାଉତକୁ ନେଇ କେନ୍ଦୁଝର ପହଞ୍ଚିଛି ପୁଲିସ। ଘଟଗାଁ ଥାନାରେ ଅଭିଯୁକ୍ତକୁ ନେଇ କମିଶନରେଟ୍ ପୁଲିସ ପହଞ୍ଚିଛି । ଘଟଗାଁ ଥାନାରେ ପଚରାଉଚରା ପରେ କିଛି ସମୟ ପରେ ସିନ୍ ରିକ୍ରିଏସନ ଆରମ୍ଭ କରିଛି ପୁଲିସ । ଯେଉଁଠି ମୃତଦେହ ପୋତା ଯାଇଛି, ସେଠାକୁ ଦୀପକକୁ ନେଇଛି ପୁଲିସ । ଭୁବନେଶ୍ୱରରେ ହତ୍ୟା ପରେ କାହିଁକି ଘଟଗାଁକୁ କାର୍ରେ ମୃତଦେହକୁ ନେଇ ପୋତିଥିଲା, ତାହା ଏବେ ଅସ୍ପଷ୍ଟ ରହିଛି । ହତ୍ୟାକାଣ୍ଡ ଘଟଣାରେ ଦୀପକର ମାଉସୀ ପୁଅ ଭାଇ ଗିରଫ ହୋଇଥିବା ନେଇ ସୂଚନା ମିଳିଛି । ମୃତଦେହ ନେଇଥିବା କାର୍ ମଧ୍ୟ ଜବତ କରିଛି ପୁଲିସ ।
ଏହାକୁ ନେଇ ପୁଲିସ କମିଶନର ଏସ୍.ଦେବଦତ୍ତ ସିଂ ସାମ୍ବାଦିକ ସମ୍ମିଳନୀ ଯୋଗେ ସୂଚନା ଦେଇଛନ୍ତି ଯେ, ଅଭିଯୁକ୍ତର ପଲିଗ୍ରାଫ୍ ଟେଷ୍ଟ ହୋଇଛି । ମାତ୍ର ରିପୋର୍ଟ ଆସି ନାହିଁ। ଅଭିଯୁକ୍ତ ଦୀପକ ଶୁଭମିତ୍ରାଙ୍କ ଠାରୁ ପ୍ରାୟ ୧୦ ଲକ୍ଷ ଟଙ୍କା ନେଇଥିବା ବେଳେ ଫେରାଉ ନଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ କଳହ ଲାଗି ରହୁଥିବା ଜଣାପଡିଛି। ଉଭୟ ୨୦୨୪ରେ ରେଜିଷ୍ଟ୍ରି ମ୍ୟାରେଜ୍ କରିଥିବାରୁ ଶୁଭମିତ୍ରା ବିବାହକୁ ସର୍ବସମ୍ମୁଖକୁ ଆଣିବା ପାଇଁ ଭୋଜି ପାଇଁ ଜିଦ୍ କରି ଟଙ୍କା ମାଗିବାରୁ ଝଗଡା ବଢିଥିଲା। ଶେଷରେ ଦୀପକ ତାଙ୍କୁ ହତ୍ୟା କରିଥିଲା । ପୁଲିସ ଘଟଣାର ଅଧିକରୁ ଅଧିକ ତଦନ୍ତ ଜାରି ରଖିଛି ।
