ନୂଆଦିଲ୍ଲୀ, ୧୩।୯: ନିଜ ଜାଲରେ ନିଜେ ଫସିଛନ୍ତି ଡୋନାଲ୍ଡ ଟ୍ରମ୍ପ୍। ଶୁଳ୍କବୃଦ୍ଧି ପରଠୁ ଦେଶରେ ବେକାରୀ ସମସ୍ୟା ସହ ଦରବୃଦ୍ଧି ହେବାରେ ଲାଗିଛି। ଯଦି ଏମିତି ପରିସ୍ଥିତି ଲାଗି ରୁହେ ତେବେ ଆମେରିକାରେ ମାନ୍ଦାବସ୍ଥା ଦେଖାଦେବ ବୋଲି ବିଶ୍ଲେଷକ ଅନୁମାନ କରୁଛନ୍ତି। ଅଗଷ୍ଟରେ ଆମେରିକାରେ ଗତ ବର୍ଷ ତୁଳନାରେ ୨.୯ ପ୍ରତିଶତ ଦରବୃଦ୍ଧି ହୋଇଛି। ଏହା ଜୁଲାଇର ୨.୭ ପ୍ରତିଶତରୁ ଅଧିକ। ଖାଦ୍ୟ ଏବଂ ଏନର୍ଜି ବ୍ୟତୀତ ମୁଖ୍ୟ ଦରବୃଦ୍ଧି ୩.୧ ପ୍ରତିଶତରେ ସ୍ଥିର ଅଛି। ଏହି ଆକଳନ ଆମେରିକୀୟ କେନ୍ଦ୍ର ବ୍ୟାଙ୍କର ସୀମାଠୁ ଅଧିକ।ପରିସ୍ଥିତିକୁ ନିୟନ୍ତ୍ରଣ ପାଇଁ ଅନେକ ଚେଷ୍ଟା ସତ୍ତ୍ବେ ସୁଫଳ ମିଳିପାରିନି ଯାହା ଆମେରିକାର ଭୟକୁ ଦ୍ବିଗୁଣିତ କରୁଛି। ଶୁଳ୍କବୃଦ୍ଧି ଆଞ୍ଚଳିକ ସ୍ତରରେ ବିଦେଶୀ ସାମଗ୍ରୀର ଦର ବୃଦ୍ଧି କରିଛି ଯାହା ସାଧାରଣ ଜନତାଙ୍କୁ ପ୍ରଭାବିତ କରୁଛି।
ୟୁଏସ ବ୍ୟୁରୋ ଅଫ୍ ଲେବର ଷ୍ଟାଟିଷ୍ଟିକ୍ସ(ବିଏଲଏସ୍) ଅନୁସାରେ ଅଗଷ୍ଟ ୨୦୨୫ରେ ତେଜରାତି ସାମଗ୍ରୀ ଦାମ୍ ଜୁଲାଇ ତୁଳନାରେ ୦.୬ ପ୍ରତିଶତ ବଢିଛି। ଚଳିତବର୍ଷ ସମୁଦାୟ ତେଜରାତି ସାମଗ୍ରୀ ଦାମ୍ ପ୍ରାୟ ୩.୩ ପ୍ରତିଶତ ବୃଦ୍ଧି ପାଇଛି। ଗତବର୍ଷ ତୁଳନାରେ କଫି ଦାମ୍ ଚଳିତବର୍ଷ ୨୧ ପ୍ରତିଶତ ବଢିଛି। ଜୁଲାଇ ତୁଳନାରେ ଅଗଷ୍ଟରେ ପେଟ୍ରୋଲ ଦାମ୍ ୧.୯ ପ୍ରତିଶତ ବୃଦ୍ଧିପାଇଛି। ଆମେରିକାରେ ମାସିକ ଖର୍ଚ୍ଚ ପ୍ରାୟ ୯୦୦ ଡଲାର(୭୫ହଜାର ଟଙ୍କା) ହୋଇଥାଏ, କିନ୍ତୁ ଏହା ଆଗକୁ ଆହୁରି ବଢିପାରେ। ଆମେରିକାର ଶ୍ରମ ବିଭାଗର ଏକ ରିପୋର୍ଟ ଅନୁସାରେ ବେକାରୀ ସମସ୍ୟା ବଢିବାରେ ଲାଗିଛି। ଅଗଷ୍ଟରେ ବେକାରୀ ହାର ୪.୩ ପ୍ରତିଶତ ହୋଇଯାଇଛି ଯାହା ୨୦୨୧ ପରଠୁ ସର୍ବୋଚ୍ଚ ସ୍ତରରେ ପହଞ୍ଚିଛି। ଶୁଳ୍କବୃଦ୍ଧିର ପ୍ରଭାବ ଆମେରିକାର ଅର୍ଥବ୍ୟବସ୍ଥା ଉପରେ ଭାରୀ ପଡୁଥିବା ନଜର ଆସୁଛି। କମ୍ପାନୀମାନେ ଦାମ୍ ବଢାଇବା ଫଳରେ ସାଧାରଣ ଜନତାଙ୍କ ଉପରେ ପ୍ରଭାବ ପଡୁଛି।
