ସମାଜ ଡିଜିଟାଲ ଡେସ୍କ: ଯୌନ କେଳେଙ୍କରୀରେ ଲିପ୍ତ କୁଖ୍ୟାତ ଅପରାଧୀ ଜେଫରୀ ଏପଷ୍ଟିନ ସହିତ ସମ୍ପର୍କ ରଖିଥିବା ଆମେରିକା ଦୂତାବାସରେ ଅବସ୍ଥାପିତ ବ୍ରିଟିଶ ଆମ୍ବାସାଡର ପିଟର ମାଣ୍ଡେଲସନଙ୍କୁ ହଟାଇଛି ବ୍ରିଟେନ। ବ୍ରିଟେନ ପ୍ରଧାନମନ୍ତ୍ରୀ କେର୍ ଷ୍ଟାର୍ମର ପିଟରଙ୍କୁ ହଟାଇବାକୁ ବୈଦେଶିକ ସଚିବଙ୍କୁ ନିର୍ଦେଶ ଦେଇଛନ୍ତି।
ଏପଷ୍ଟିନଙ୍କ ସହିତ ପିଟରଙ୍କ କେବଳ ଗଭୀର ସମ୍ପର୍କ ନ ଥିଲା, ବରଂ ଏପଷ୍ଟିନ ଯେତେବେଳେ ପ୍ରଥମେ ଦୋଷୀ ସାବ୍ୟସ୍ତ ହୋଇଥିଲେ ସେତେବେଳେ ପିଟର ତାହାକୁ ତ୍ରୁଟିପୂର୍ଣ୍ଣ ଏବଂ ଉପର କୋର୍ଟରେ ଚ୍ୟାଲେଞ୍ଜ କରାଯିବା ଉଚିତ ବୋଲି କହିଥିଲେ। ପିଟର ଏ ନେଇ ଏପଷ୍ଟିନଙ୍କୁ କେତେକ ଇ-ମେଲ ମଧ୍ୟ କରିଥିଲେ। କିନ୍ତୁ ସେତେବେଳେ ତାହାକୁ ଗୋପନ ରଖାଯାଇଥିଲା। କିନ୍ତୁ କେତେକ ଅନ୍ତର୍ଜାତୀୟ ଗଣମାଧ୍ୟମରେ ବର୍ତ୍ତମାନ ଏସବୁ ଇ-ମେଲଗୁଡ଼ିକୁ ପ୍ରଘଟ କରାଯିବା ପରେ ବ୍ରିଟେନ ପ୍ରଧାନମନ୍ତ୍ରୀ ପିଟରଙ୍କୁ ଦୂତାବାସରୁ ବହିସ୍କାର କରିଛନ୍ତି।
