ନୂଆଦିଲ୍ଲୀ: ପୁଲୱାମା ଆତଙ୍କବାଦୀ ଆକ୍ରମଣର ପ୍ରତିଶୋଧ ନେଇଛି ଭାରତ । ମଙ୍ଗଳବାର ସକାଳେ ଭାରତୀୟ ବାୟୁସେନା ନିୟନ୍ତ୍ରଣ ରେଖା (ଏଲଓସି) ପାର ହୋଇ ଆତଙ୍କବାଦୀ କ୍ୟାମ୍ପକୁ ଧ୍ବଂସ କରିଛି । ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ମିଳିଥିବା ସୂଚନା ଅନୁଯାୟୀ ଯୁଦ୍ଧ ବିମାନ ଆତଙ୍କବାଦୀ କ୍ୟାମ୍ପ ଉପରେ ପ୍ରାୟ ୧୦୦୦ କିଲୋଗ୍ରାମ ଓଜନର ବୋମା ପକାଇଥିଲା । ଏଥିରେ ବାଲାକୋଟ ଏବଂ ଚାକୋଠି ସମେତ ମୁଜାଫରବାଦରେ ଥିବା ବହୁ ଆତଙ୍କବାଦୀ ଶିବିର ଧ୍ଵଂସ ହୋଇଛି । ଭାରତର ପ୍ରତିଶୋଧ ପରେ ପାକିସ୍ତାନ ଗଣମାଧ୍ୟମରେ କ’ଣ ପ୍ରତିକ୍ରିୟା ପ୍ରକାଶ ପାଇଛି ଆସନ୍ତୁ ଜାଣିବା ।
ପାକିସ୍ତାନ ସମାଚାର ସାଇଟ ଡନରେ ପ୍ରକାଶ ପାଇଛି ଯେ, ମୁଜାଫରବାଦ ସେକ୍ଟରରେ ଭାରତୀୟ ବିମାନ ସୀମା ଉଲ୍ଲଂଘନ ପ୍ରବେଶ କରିବାକୁ ଚେଷ୍ଟା କରିଥିଲା । କିନ୍ତୁ ପାକିସ୍ତାନ ବାୟୁସେନାର କାର୍ଯ୍ୟାନୁଷ୍ଠାନ ପରେ ଭାରତୀୟ ବିମାନ ସେଠାରୁ ପଳାଇ ଯାଇଥିଲେ । ଆହୁରି ମଧ୍ୟ ଲେଖା ହୋଇଛି ଯେ, ଏହାକୁ ନେଇ ନୂଆଦିଲ୍ଲୀରୁ କୌଣସି ପ୍ରତିକ୍ରିୟା ମିଳିପାରିନାହିଁ । ବାଲାକୋଟରେ ବୋମା ପକାଇ ଯାଇଛି, ହେଲେ ଏଥିରେ କେହି ମୃତାହତ ହୋଇ ନାହାନ୍ତି । ପାକିସ୍ତାନ ସେନାର ପ୍ରବକ୍ତା ମେଜର ଜେନେରାଲ ଆସିଫ ଗଫୁର ତୁରନ୍ତ କାର୍ଯ୍ୟାନୁଷ୍ଠାନ ନେଇଥିଲେ ।
ପୁଲୱାମାରେ ୪୦ ଭାରତୀୟ ଯବାନଙ୍କ ଉପରେ ହୋଇଥିବା ଆତ୍ମଘାତୀ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ମନୋମାଳିନ୍ୟ ବୃଦ୍ଧି ପାଇଛି । ଆକ୍ରମଣ ପଛରେ ପାକିସ୍ତାନର ହାତ ଥିବା ଭାରତ କହିଛି। କିନ୍ତୁ ଇସଲାମାବାଦ ଏହି ଅଭିଯୋଗକୁ ଖଣ୍ଡନ କରିଛି ବୋଲି ଡନରେ ପ୍ରକାଶ ପାଇଛି ।
ଅନ୍ୟପକ୍ଷରେ ପାକିସ୍ତାନ ମେଜର ଜେନେରାଲ ଆସିଫ ଗଫୁର ଆକ୍ରମଣକୁ ସ୍ବୀକାର କରିଛନ୍ତି । ସେ ଟୁଇଟ କରି କହିଛନ୍ତି ଯେ, ଭାରତୀୟ ଯୁଦ୍ଧ ବିମାନ ଦୁଇଦେଶର ସୀମାକୁ ଉଲ୍ଲଂଘନ କରି ଆକ୍ରମଣ କରିଛି। ସେ ଆକ୍ରମଣର କେତେକ ଫଟୋଚିତ୍ର ଟୁଇଟରରେ ପୋଷ୍ଟ କରିଛନ୍ତି।
