ବେଙ୍ଗାଲୁରୁ: ଭାରତୀୟ ଟ୍ବେଣ୍ଟି୨୦ ଦଳର ଅଧିନାୟକ ସୂର୍ଯ୍ୟକୁମାର ଯାଦବ ଫିଟ୍ନେସ ପରୀକ୍ଷାରେ କୃତକାର୍ଯ୍ୟ ହୋଇଛନ୍ତି। ଶନିବାର ବେଙ୍ଗାଲୁରୁସ୍ଥିତି ବିସିସିଆଇ ସେଣ୍ଟର ଅଫ୍ ଏକ୍ସେଲେନ୍ସ (ସିଓଇ)ରେ ସୂର୍ଯ୍ୟକୁମାରଙ୍କ ଫିଟ୍ନେସ ପରୀକ୍ଷା ନିଆ ଯାଇଥିଲା, ଯାହାକୁ ସେ ସଫଳତାର ସହ ପାର କରିଛନ୍ତି। ଶେଷଥର ଆଇପିଏଲ୍ ଖେଳି ପ୍ଲେୟର ଅଫ୍ ଦି ଟୁର୍ଣ୍ଣାମେଣ୍ଟ ହେବା ପରେ ଜୁନ୍ରେ ସୂର୍ଯ୍ୟକୁମାରଙ୍କର ଜର୍ମାନୀର ମ୍ୟୁନିକ୍ସରେ ସ୍ପୋର୍ଟସ ହର୍ନିଆ ଅସ୍ତ୍ରୋପଚାର କରା ଯାଇଥିଲା। ସୁସ୍ଥହେବା ପରେ ସୂର୍ଯ୍ୟକୁମାର ସିଓଇ ଆସି ଅଭ୍ୟାସ କରୁଥିଲେ। ଭାରତୀୟ ଦଳ ପାଇଁ ଖେଳିବା ପାଇଁ ଫିଟ୍ନେସ ପରୀକ୍ଷାରେ କୃତକାର୍ଯ୍ୟ ହେବା ବାଧ୍ୟତାମୂଳକ ଏବଂ ସୂର୍ଯ୍ୟକୁମାର ଫିଟ୍ ଘୋଷିତ ହୋଇଛନ୍ତି ବୋଲି ଶନିବାର ବିସିସିଆଇ ଘୋଷଣା କରିଛି। ଫଳରେ ସୂର୍ଯ୍ୟକୁମାର ଏସିଆ କପ୍ରେ ଭାରତୀୟ ଦଳର ନେତୃତ୍ବ ନେବା ପ୍ରାୟ ନିଶ୍ଚିତ ହୋଇଯାଇଛି। ସେପ୍ଟେମ୍ବର ୯ରୁ ୟୁଏଇର ଏସିଆ କପ୍ ଆରମ୍ଭ ହେଉଥିବା ବେଳେ ୧୦ରେ ଆୟୋଜକ ୟୁଏଇ ବିପକ୍ଷରେ ଭାରତ ପ୍ରଥମ ମ୍ୟାଚ୍ ଖେଳିବ। ଆସନ୍ତା ୧୯ରେ ମୁମ୍ବଇରେ ଏସିଆ କପ୍ ପାଇଁ ଦଳ ମନୋନୟନ ପାଇଁ କମିଟିର ବୈଠକ ବସିବ। ଅଧିନାୟକ ଭାବେ ୩୪ ବର୍ଷ ବୟସ୍କ ସୂର୍ଯ୍ୟକୁମାର ଏହି ବୈଠକରେ ଯୋଗଦେବେ। ଗତ ଆଇପିଏଲ୍ରେ ମୁମ୍ବଇ ଇଣ୍ଡିଆନ୍ସ ପାଇଁ ଖେଳି ସୂର୍ଯ୍ୟକୁମାର ୭୧୭ ରନ୍ କରିଥିଲେ।
Popular Categories
Previous article
Next article