ବିଷ ପିଇ ଚାଷୀ ଆତ୍ମହତ୍ୟା ଅଭିଯୋଗ

ଟିଟିଲାଗଡ଼ : ଟିଟିଲାଗଡ଼ ବ୍ଲକ ଅନ୍ତର୍ଗତ କୁରସୁଡ଼ ଗ୍ରାମର ଜଣେ ଅଭାବଗ୍ରସ୍ତ ଚାଷୀ ବିଷ ପିଇ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ମୃତ ଚାଷୀ ଗ୍ରାମର ପରମେଶ୍ୱର ଭୋଇଙ୍କ ପୁଅ ଦୁର୍ଗା ଭୋଇ ବୋଲି ଜଣାଯାଇଛି । ସେ ଚଳିତ ବର୍ଷ ଧାନ ଏବଂ କପା ଚାଷ କରିଥିବା ବେଳେ ଫସଲ କ୍ଷତି ହେବା ସହ ଗ୍ରୁପ ଟଙ୍କା ସୁଝି ନ ପାରିବାରୁ ଚିନ୍ତାରେ ଥିଲେ ବୋଲି ତାଙ୍କ କାକା ପୁଅ ଭାଇ ଭାସ୍କର ଭୋଇ କହିଛନ୍ତି । ଆଜି ପୂର୍ବାହ୍ନରେ ସେ ବିଷପାନ କରିଥିବା ଜଣାପଡିବା ପରେ ଘର ଲୋକ ତାଙ୍କୁ ପ୍ରଥମେ ସିନ୍ଧେକେଲା ଏବଂ ପରେ ଟିଟିଲାଗଡ଼ ଉପଖଣ୍ଡ ଡାକ୍ତରଖାନାରେ ଭର୍ତ୍ତୀ କରିଥିଲେ । ତେବେ ଡାକ୍ତର ତାଙ୍କୁ ବଲାଙ୍ଗୀର ରେଫର କରିବାରୁ ପାଖ ହେବ ବୋଲି ଭବାନୀପାଟଣାକୁ ନେଉଥିବା ବେଳେ ବାଟରେ ତାଙ୍କ ପରଲୋକ ଘଟିଥିଲା । ଭବାନୀପାଟଣା  ଜିଲ୍ଲା  ମୁଖ୍ୟ ଡାକ୍ତରଖାନାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ । ତାଙ୍କର ୧୧ ବର୍ଷର ପୁଅ ଏବଂ ୬ ବର୍ଷର କନ୍ୟା ସନ୍ତାନ ଥିବା ଜଣାପଡିଛି । ଏହାକୁ ନେଇ ସ୍ଥାନୀୟ ଅଞ୍ଚଳରେ ଆଲୋଡନ ଖେଳିଯାଇଛି ।