ସମାଜ ଡିଜିଟାଲ ଡେସ୍କ: ବୈଦ୍ୟୁତିକ ଯାନ କ୍ରୟକୁ ଅଧିକ ସହଜ କରିବା ଲାଗି କେନ୍ଦ୍ର ସରକାର ଜାରି ରଖିଥିବା ପିଏମ ଇ-ଡ୍ରାଇଭ ଯୋଜନାର ସମୟସୀମାକୁ ବୃଦ୍ଧି କରାଯାଇଛି। ଭାରି ଉଦ୍ୟୋଗ ମନ୍ତ୍ରଣାଳୟ ପକ୍ଷରୁ ଏହି ଯୋଜନା(ପ୍ରଧାନମନ୍ତ୍ରୀ ଇଲେକ୍ଟ୍ରିକ ଡ୍ରାଇଭ ରିଭୋଲ୍ୟୁସନ ଇନ ଇନୋଭେଟିଭ ଭେହିକଲ ଏନହାନ୍ସମେଣ୍ଟ)ର ସମୟସୀମାକୁ ଆହୁରି ୨ ବର୍ଷ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଏହା ୨୦୨୮ ମାର୍ଚ୍ଚ ୩୧ ପର୍ଯ୍ୟନ୍ତ ଚାଲୁ ରହିବ।
ସରକାର ୨୦୨୪ ଅକ୍ଟୋବର ୧ରେ ଏହି ଯୋଜନାର ଶୁଭାରମ୍ଭ କରିଥିଲେ। ୧୦ ହଜାର ୯୦୦ କୋଟି ଟଙ୍କାର ଏହି ଯୋଜନା ଆଗାମୀ ମାର୍ଚ୍ଚ ୨୦୨୬ରେ ସମାପ୍ତ ହେବାର ଥିଲା। ସମୟସୀମା ବୃଦ୍ଧି କରାଯିବା ଫଳରେ ଏହାର ଫାଇଦା ସିଧାସଳଖ ଗ୍ରାହକଙ୍କୁ ମିଳିବ। ସବୁଠୁ ବଡ଼ ଫାଇଦା ହେଉଛି ସବସିଡି ବା ରିହାତି। ବୈଦ୍ୟୁତିକ ଯାନ କିଣିଲେ ସରକାର ସବସିଡି ଯୋଗାଇ ଦେଉଛନ୍ତି। ପିଏମ-ଇ ଡ୍ରାଇଭ ଯୋଜନାରେ ହିଁ ସବସିଡି ମିଳିଥାଏ। ୨୦୨୬ରେ ଯୋଜନା ବନ୍ଦ କରିବାକୁ ସରକାର ଚିନ୍ତା କରୁଥିଲେ। ଏପରି ହୋଇଥିଲେ ୨୦୨୬ ମାର୍ଚ୍ଚ ପରଠାରୁ ବୈଦ୍ୟୁତିକ ଯାନ କିଣିଲେ ଗ୍ରାହକଙ୍କୁ ସବସିଡି ମିଳି ନ ଥାଆନ୍ତା। କିନ୍ତୁ ଏଣିକି ୨୦୨୮ ପର୍ଯ୍ୟନ୍ତ ସବସିଡି ପ୍ରଦାନ କରାଯିବ।
ପିଏମ-ଇ ଡ୍ରାଇଭ ଯୋଜନା କେବଳ ଯାନ କ୍ରୟକୁ ସହଜ କରୁ ନ ଥିଲା, ବରଂ ସବସିଡି ସୁବିଧା ବି ଉପଲବ୍ଧ କରିଥାଏ। ଏହା ସହିତ ପବ୍ଲିକ ଚାର୍ଜିଂ ଇନଫ୍ରା, ଟେଷ୍ଟିଙ୍ଗ ସୁବିଧା ଆଦିକୁ ବି ପ୍ରୋତ୍ସାହିତ କରିଥାଏ। ଗତ ଗୁରୁବାର ମନ୍ତ୍ରଣାଳୟ ପକ୍ଷରୁ ଜାରି ହୋଇଥିବା ଏକ ବିଜ୍ଞପ୍ତିରେ ଏହି ସୂଚନା ଦିଆଯାଇଛି।
