ଡେସ୍କ: ଅହମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣାରେ ୨୬୦ ଜଣଙ୍କ ମୃତ୍ୟୁ ହେବା ପରେ ବ୍ରିଟେନର ଅନେକ ପରିବାରକୁ ଭୁଲ ମୃତଦେହ ମିଳିଥିବା ଅଭିଯୋଗ ହୋଇଛି। ଗତ ଜୁନ ମାସରେ ଘଟିଥିବା ଏହି ଦୁର୍ଘଟଣାରେ ୫୨ ଜଣ ବ୍ରିଟିଶ ନାଗରିକ ପ୍ରାଣ ହରାଇଥିଲେ। ପରେ ସରକାରୀ ସଂସ୍ଥା ଦ୍ୱାରା ଜେନେଟିକ୍ ପରୀକ୍ଷା ଓ ଦନ୍ତ ରେକର୍ଡ ଦ୍ୱାରା ଚିହ୍ନଟ କରାଯାଇ ମୃତଦେହ ଗୁଡିକୁ ବ୍ରିଟେନ ପଠାଯାଇଥିଲା।
ତେବେ ସେଠାକାର ଦୈନିକ ସମ୍ବାଦପତ୍ର ‘ଦ ଡେଲି ମେଲ୍’ରେ ପ୍ରକାଶିତ ସମ୍ବାଦ ଅନୁଯାୟୀ, ବ୍ରିଟେନର କେତେକ ପରିବାରଙ୍କୁ ସେମାନଙ୍କ ପ୍ରିୟଜନଙ୍କ ମୃତଦେହ ପରିବର୍ତ୍ତେ ଅନ୍ୟ ମୃତଦେହ ମିଳିଥିବା କୁହାଯାଇଛି। ରିପୋର୍ଟ ଅନୁଯାୟୀ, ଅତି କମରେ ଦୁଇଟି ମାମଲାରେ, ମୃତକଙ୍କ ପରିବାରକୁ ଭୁଲ ମୃତଦେହ ମିଳିଛି। ଅନ୍ତିମ ସଂସ୍କାର କରିବା ଲାଗି ଅପେକ୍ଷା କରିଥିବା ଗୋଟିଏ ପରିବାରକୁ ପ୍ରଦାନ କରାଯାଇଥିବା କଫିନରେ ଭୁଲ ମୃତଦେହ ଥିବା ଜଣାପଡିଛି। ସେହିଭଳି ଏକାଧିକ ବ୍ୟକ୍ତିଙ୍କ ମୃତଦେହକୁ ଏକ କଫିନରେ ଭୁଲ ଭାବରେ ଏକାଠି କରି ଏକ ପରିବାରକୁ ଦିଆଯାଇଥିଲା।
ଏହି ତ୍ରୁଟି ସମ୍ପର୍କରେ ଜଣାପଡିବା ପରେ ତଦନ୍ତ ଆରମ୍ଭ ହୋଇଛି। ଅନ୍ୟପକ୍ଷରେ ଭାରତୀୟ କର୍ତୃପକ୍ଷ ପ୍ରକାଶିତ ଅଭିଯୋଗକୁ ଖଣ୍ଡନ କରିଛନ୍ତି। ଏ ନେଇ ବ୍ରିଟିଶ କର୍ତ୍ତୃପକ୍ଷଙ୍କ ସହ ଯୋଗାଯୋଗ କରାଯାଇଥିବା କୁହାଯାଇଛି।
