ନୂଆଦିଲ୍ଲୀ : ଯୁବ ସୁଟର୍ ମାନୁ ଭାକେର ଓ ବିଜୟବୀର ସିନ୍ଧୁଙ୍କ ଦ୍ବାଦଶ ବୋର୍ଡ ପରୀକ୍ଷାକୁ ଘୁଞ୍ଚାଇ ଦେବାକୁ ସିବିଏସ୍ସିକୁ ଅନୁରୋଧ କରିଛି ଭାରତୀୟ କ୍ରୀଡ଼ା ପ୍ରାଧିକରଣ। ମାନୁ ଓ ବିଜୟବୀର ମାର୍ଚ୍ଚ ୨୫ରୁ ଏପ୍ରିଲ୍ ୨ ପର୍ଯ୍ୟନ୍ତ ଚାଇନିଜ ତାଇପେରେ ଅନୁଷ୍ଠିତ ହେବାକୁ ଥିବା ଏସିଆନ୍ ଏୟାରଗନ୍ ଚମ୍ପିଆନସିପ୍ରେ ଭାଗ ନେବାକୁ ଯାଉଛନ୍ତି। ସେହି ସମୟରେ ଏହି ଦୁଇ ସୁଟରଙ୍କ ଦ୍ବାଦଶ ବୋର୍ଡ ପରୀକ୍ଷାର ଦୁଇଟି ବିଷୟ ଅନୁଷ୍ଠିତ ହେବାକୁ ଅଛି। ତେଣୁ ଦୁଇ ସୁଟରଙ୍କ ପରୀକ୍ଷା ନିମନ୍ତେ ଅଲଗା ତାରିଖ ନିର୍ଦ୍ଧାରଣ କରିବାକୁ ଭାରତୀୟ କ୍ରୀଡ଼ା ପ୍ରାଧିକରଣ ତରଫରୁ ସିବିଏସ୍ସିକୁ ଅନୁରୋଧ କରାଯାଇଛି।
ଏ ସଂପର୍କରେ ଗଣମାଧ୍ୟମକୁ ସୂଚନା ଦେଇ ଭାରତୀୟ କ୍ରୀଡ଼ା ପ୍ରାଧିକରଣର ଜଣେ ଅଧିକାରୀ କହିଥିଲେ ମାନୁ ଓ ବିଜୟବୀରଙ୍କ କ୍ରୀଡ଼ା ଓ ପାଠପଢ଼ା ଉଭୟ ଯେପରି ଠିକ୍ଠାକ୍ ଚାଲିବ ସେଥିନେଇ କ୍ରୀଡ଼ା ପ୍ରାଧିକରଣ ବେଶ୍ ସତର୍କ ରହିଛି। ମାନୁ ମାର୍ଚ୍ଚ ୨୫ରେ ଇତିହାସ ଓ ୩୦ରେ ଶାରୀରିକ ଶିକ୍ଷା ବିଭାଗରେ ପରୀକ୍ଷା ଦେବାର ଅଛି। ଅନ୍ୟପକ୍ଷରେ ବିଜୟବୀର ମାର୍ଚ୍ଚ ୨୯ରେ ପରୀକ୍ଷା ଦେବାର ଅଛି। ଏହି ସମୟରେ ଏସିଆନ୍ ଏୟାରଗନ୍ ଚମ୍ପିଆନସିପ୍ ଆୟୋଜିତ ହେବ। ଦୁଇ ସୁଟର୍ ଏହି ଚମ୍ପିଆନସିପ୍ରେ ଭାଗ ନେବେ। ତେଣୁ ସେମାନେ ପରୀକ୍ଷା ଦେବା ନେଇ ସମସ୍ୟା ସୃଷ୍ଟି ହେବ। ପରୀକ୍ଷା ତାରିଖ ଘୁଞ୍ଚାଇ ଦେବାକୁ ସିବିଏସସିକୁ ଅନୁରୋଧ କରିବାକୁ ମାନୁ ଓ ବିଜୟବୀରଙ୍କ ପରିବାରବର୍ଗ କ୍ରୀଡ଼ା ପ୍ରାଧିକରଣ ଅଧିକାରୀଙ୍କୁ ଅନୁରୋଧ କରିଥିଲେ। ସେମାନଙ୍କ ଅନୁରୋଧକୁ ଦୃଷ୍ଟିେର ରଖି ସିବିଏସ୍ସିକୁ ପତ୍ର ଲେଖାଯାଇଛି।
ମାନୁ ଟାର୍ଗେଟ୍ ଅଲିମ୍ପିକ୍ ପୋଡିୟମ ସ୍କିମ୍ରେ ସାମିଲ ହୋଇଥିବା ବେଳେ
ରାଜ୍ୟଗୋଷ୍ଠୀ କ୍ରୀଡ଼ା, ବିଶ୍ବ କପ୍, ଯୁବ ଅଲିମ୍ପିକ୍ରେ ସ୍ବର୍ଣ୍ଣ ପଦକ ଜିତିଥିଲେ। ଅନ୍ୟପକ୍ଷରେ ବିଜୟବୀର ଗତମାସରେ ଆୟୋଜିତ ଖେଲୋ ଇଣ୍ଡିଆ ଯୁବ କ୍ରୀଡ଼ାରେ ୨୧ ବର୍ଷରୁ କମ୍ ବିଭାଗରେ ରୌପ୍ୟ ପଦକ ହାସଲ କରିଥିଲେ। ମାନୁ ଆସନ୍ତା ୨୦ରୁ ଆୟୋଜିତ ହେବାକୁ ଯାଉଥିବା ବନ୍ଧୁକଚାଳନା ବିଶ୍ବକପ୍ରେ ଭାଗ ନେବେ।
