କାମାକ୍ଷାନଗର: କାମାକ୍ଷାନଗର ଅଞ୍ଚଳର ଶିକ୍ଷା, ସ୍ୱାସ୍ଥ୍ୟ, ଗମନାଗମନ ଆଦି ସମସ୍ୟା ନେଇ ଏସୟୁସିଆଇ ପକ୍ଷରୁ ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରି ଏକ ୧୪ ଦଫା ସମ୍ବଳିତ ଦାବିପତ୍ର ପ୍ରଦାନ କରାଯାଇଛି।
କାମାକ୍ଷାନଗର ଅଞ୍ଚଳରେ ରହିଥିବା ବିଭିର୍ନ୍ନ ସମସ୍ୟାକୁ ନେଇ ଏସ ୟୁ ସି ଆଇ ପକ୍ଷରୁ ଆହ୍ୱାନ କ୍ରମେ ଜିରୀଡମାଳି ଠାରେ ସମବେତ ହେବା ପରେ ସେଠାରୁ ଏକ ଶୋଭାଯାତ୍ରାରେ ବାହାରି ସ୍ଲୋଗାନ ଦେଇ ସହର ପରିକ୍ରମା କରି ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲେ। ସେଠାରେ ନେତୃବର୍ଗ ବିଭିର୍ନ୍ନ ସମସ୍ୟା ନେଇ ଭାଷଣ ପ୍ରଦାନ କରିଥିଲେ।
ଏଥିରେ ମୁଖ୍ୟତଃ ଉପଖଣ୍ଡ ଚିକିତ୍ସାଳୟ ଅବ୍ୟବସ୍ଥା ମଧ୍ୟରେ ଥିବା ବେଳେ ଉପଖଣ୍ଡ ଚିକିତ୍ସାଧିକାରୀ ସରକାରୀ ଚିକିତ୍ସାଳୟରେ ରୋଗୀ ନଦେଖି ପରିସର ମଧ୍ୟରେ ଥିବା ନିଜ ବାସଭବନରେ ୩ ଶହ ଟଙ୍କା ଦେୟ ନେଇ ୩ରୁ ୪ ହଜାର ଟଙ୍କାର ଔଷଧ ଚିଠା ଲେଖିବା ଏବଂ ଚିକିତ୍ସାଳୟର ପରିଚାଳନାରେ ଅବ୍ୟବସ୍ଥା ସୃଷ୍ଟି କରିବା, ଉପଖଣ୍ଡର ୪ଟି ବ୍ଲକରେ ଶିକ୍ଷାର ଅବନତି, ଢେଙ୍କାନାଳ ଠାରୁ କାମାକ୍ଷାନଗର ଦେଇ ଆଦିବାସୀ ବହୁଳ କଙ୍କଡ଼ାହାଡ଼ ପର୍ଯ୍ୟନ୍ତ ରେଳ ଲାଇନ ସଂଯୋଗ, ସମସ୍ତ ଚାଷ ଜେମିକୁ ଜଳସେଚନ ବ୍ୟବସ୍ଥା , ପ୍ରତ୍ୟେକ ପରିବାରକୁ ପାନୀୟ ଜଳ ଯୋଗାଣ, ଜଙ୍ଗଲ ଅଞ୍ଚଳରେ ବସବାସ କରୁଥିବା ସମସ୍ତ ଅଧିବାସୀଙ୍କୁ ଜମି ପଟ୍ଟା ଓ ଘର ଡ଼ିହ ପଟ୍ଟା ପ୍ରଦାନ ସହିତ ଆବାସିକ ବିଦ୍ୟାଳୟ ସ୍ଥାପନ କରିବା ଆଦି ସମସ୍ୟା ଉପରେ ଆଲୋକପାତ କରିଥିଲେ। ପରେ ଏକ ଦାବିପତ୍ର ଉପଜିଲ୍ଲାପାଳଙ୍କ ଅନୁପସ୍ଥିତିରେ ଡେପୁଟି କଲେକ୍ଟର ଜ୍ୟୋତିରୁପା ଶତପଥୀଙ୍କୁ ପ୍ରଦାନ କରାଯାଇଥିଲା।
