ଅହମ୍ମଦାବାଦ : ଗୁଜରାଟର ବିଭିନ୍ନ ସ୍ଥାନରେ ପ୍ରବଳ ବର୍ଷା। ଝଡ଼ ତୋଫାନ ଯୋଗୁଁ ୧୪ ଜଣ ପ୍ରାଣ ହରାଇଛନ୍ତି। ବିଗତ ଚବିଶ ଘଣ୍ଟା ମଧ୍ୟରେ ଖେଡା, ଗାନ୍ଧୀନଗର, ମେହସାଣା ଓ ଭଦୋଦରା ଜିଲାରେ ୨୫ରୁ ୪୦ ମିଲିମିଟର ବର୍ଷା ହୋଇଥିବା ରେକର୍ଡ କରାଯାଇଛି। ଅଧିକ ବେଗରେ ପବନ ବହିବାରୁ ବିଭିନ୍ନ ସ୍ଥାନରେ ଗଛ, ବିଦ୍ୟୁତ୍ ଖୁଣ୍ଟ, ହୋର୍ଡିଂ ଇତ୍ୟାଦି ଉପୁଡି ପଡିଛି। ବଜ୍ରପାତ, ବିଦ୍ୟୁତ୍ ସଂସ୍ପର୍ଶ ଏବଂ ଗଛ, ବାସଗୃହ ଭୁଶୁଡି ପଡିବାରୁ ଅହମ୍ମଦବାଦ, ଆନନ୍ଦ, ଖେଡା,ଦାହୋଡ୍, ଆରାବଳୀ ଏବଂ ଭଦୋଦରା ଭଳି ଜିଲାରେ ୧୪ ଜଣଙ୍କର ମୃତ୍ୟୁ ଘଟିଥିବା କୁହାଯାଇଛି। ଦାହୋଡ ଜିଲାର ଲିମ୍ଖେଡା ଅଞ୍ଚଳରେ ବିଦ୍ୟୁତ୍ ତାର ଛିଣ୍ଡିପଡି ନିଆଁ ଲାଗିବାରୁ ୧୫ରୁ ଅଧିକ ଛୁମ୍ପୁଡି ପୋଡି ଛାରଖାର ହୋଇଯାଇଛି। ଆଗାମୀ ତିନିଦିନ ଧରି ବନସକଣ୍ଠା, କଚ୍ଛ, ସାବରକଣ୍ଠା, ଆରାବଳୀ ଓ ଆନନ୍ଦ ଜିଲାରେ ପ୍ରବଳରୁ ଅତି ପ୍ରବଳ ବର୍ଷା ହେବ ବୋଲି ପାଣିପାଗ କାର୍ଯ୍ୟାଳୟ ପକ୍ଷରୁ ଚେତାବନୀ ଦିଆଯାଇଛି। ଏଥିସହିତ ଘଣ୍ଟାକୁ ୬୦ରୁ ୭୦ କିମି ବେଗରେ ପବନ ବହିବାର ସମ୍ଭାବନା ଥିବାରୁ ଲୋକଙ୍କୁ ଘରେ ରହିବାକୁ ପରାମର୍ଶ ଦିଆଯାଇଛି।
Popular Categories
Previous article
Next article