ପିପିଲି :ପିପିଲି ଥାନା ଅନ୍ତର୍ଗତ ସଁପୁର ଗ୍ରାମରୁ ରବିବାର ସକାଳେ ଏକ ଅଣ୍ଡିରା ଚିତ୍ରା ହରିଣକୁ ଉଦ୍ଧାର କରାଯାଇଛି। ହରିଣଟି ଗ୍ରାମ ନିକଟ ଧାନ କ୍ଷେତରେ ଏଣେ ତେଣେ ବୁଲୁଥିବା ବେଳେ କେତେକ ବୁଲା କୁକୁର ତାକୁ ଆକ୍ରମଣ କରିବା ପାଇଁ ଗୋଡାଉଥିବାର ସ୍ଥାନୀୟ ଲୋକେ ଦେଖିଥିଲେ। ଏହି ଖବର ପ୍ରଚାରିତ ହୋଇଯିବା ପରେ ଘଟଣାସ୍ଥଳରେ ଦେଖଣାହାରୀଙ୍କ ଭିଡ ଜମିଥିଲା।
ଗ୍ରାମର କେତେକ ଯୁବକମାନେ ବିନା ଆଘାତରେ ହରିଣଟିକୁ କାବୁ କରିବା ପରେ ବନ ବିଭାଗକୁ ଖବର ଦେଇଥିଲେ। ବାଳକାଟୀ ବନ ବିଭାଗର କର୍ମଚାରୀମାନେ ସେଠାରେ ପହଞ୍ôଚ ହରିଣଟିକୁ ସୁରକ୍ଷିତ ଭାବେ ଉଦ୍ଧାର କରିବା ପରେ ତା’ର ଆବଶ୍ୟକୀୟ ସ୍ୱାସ୍ଥ୍ୟ ପରୀକ୍ଷା ଓ ଚିକିତ୍ସା କରାଇଥିଲେ। ପରେ ଉକ୍ତ ହରିଣଟିକୁ ଭଁଅରା ସଂରକ୍ଷିତ ଜଙ୍ଗଲରେ ସୁରକ୍ଷିତ ଭାବେ ଛାଡ଼ି ଦିଆଯାଇଥିବା ସଂପର୍କରେ ବାଳକାଟୀ ରେଞ୍ଜ ଅଫିସର ରେଶମା ପରିଡ଼ା ସୂଚନା ଦେଇଛନ୍ତି। ଖାଦ୍ୟ ଓ ପାଣି ଅନ୍ୱେଷଣରେ ଉକ୍ତ ହରିଣଟି ବାଲୁଖଣ୍ଡ ଜଙ୍ଗଲ ଅଞ୍ଚଳରୁ ଏଠାକୁ ଚାଲି ଆସିଥିବା କୁହାଯାଉଛି।
